چھ ریاستوں میں SIR کی مدت میں توسیع، لیکن بنگال کو کوئی رعایت نہیں ملی — الیکشن کمیشن کا بڑا فیصلہ

الیکشن کمیشن آف انڈیا نے خصوصی انتخابی فہرست کی نظرِ ثانی یعنی Special Intensive Revision (SIR) کے شیڈول میں بڑی تبدیلی کا اعلان کیا ہے۔ ملک کی چھ ریاستوں اور ایک مرکز کے زیر انتظام خطے میں SIR کی آخری تاریخ بڑھا دی گئی ہے، تاہم حیران کن طور پر مغربی بنگال کو اس توسیع میں شامل نہیں کیا گیا۔

توسیع حاصل کرنے والی ریاستوں میں تمل ناڈو، گجرات، مدھیہ پردیش، چھتیس گڑھ، اتر پردیش اور جزائر انڈمان و نکوبار شامل ہیں۔ ان علاقوں میں SIR کیلئے نئی آخری تاریخیں 14 دسمبر، 18 دسمبر اور 26 دسمبر کے درمیان مقرر کی گئی ہیں۔

الیکشن کمیشن کے مطابق ان ریاستوں کے چیف الیکٹورل آفیسرز کی درخواست پر یہ فیصلہ کیا گیا تاکہ زیادہ سے زیادہ اہل ووٹرز کو اپنا نام درج کرانے کا موقع مل سکے۔ تاہم مغربی بنگال—جہاں 2026 میں انتخابات ہونے ہیں—کو کسی قسم کی توسیع نہیں دی گئی۔ اس سے قبل یہ قیاس آرائیاں کی جارہی تھیں کہ شاید بنگال میں بھی نظر ثانی کے کام کیلئے مہلت بڑھائی جائے، مگر کمیشن نے واضح کردیا کہ بنگال کی ڈرافٹ ووٹر لسٹ 16 دسمبر کو ہی جاری ہوگی اور ڈیڈلائن میں کوئی تبدیلی نہیں ہوگی۔

اسی دوران، گوا، لکشدیپ، راجستھان اور مغربی بنگال میں SIR کا دوسرا مرحلہ پہلے ہی مکمل ہوچکا ہے اور ان ریاستوں کی ڈرافٹ ووٹر لسٹس 16 دسمبر کو شائع ہوں گی۔ الیکشن کمیشن نے اس بات پر زور دیا کہ کوئی اہل ووٹر فہرست سے محروم نہ رہے، اس لئے عوام کو فارم 6 بھرنے اور آن لائن یا متعلقہ BLO کے ذریعے اپنی تفصیلات اپ ڈیٹ کرانے کی اپیل کی گئی ہے۔

حتمی ووٹر لسٹ فروری 2026 میں شائع کی جائے گی۔
Munsif News 24×7 اس معاملے کی ہر نئی پیش رفت اپنے قارئین تک پہنچاتا رہے گا۔