گورنر کی جانب سے ایم ایل سی امیدواروں کو مسترد کرنے پرریاستی وزیر ٹی ہریش راؤ کا اظہارِ ناراضگی

حیدرآباد: ریاستی وزیر برائے فینانس وصحت ٹی ہریش راؤ نے گورنر تملی سائی سوندرا راجن کی جانب سے گورنر کے کوٹہ کے تحت سفارش کردہ ایم ایل سی امیدواروں کو مسترد کرنے پر ناراضگی کا اظہار کیا۔

انہوں نے کہا کہ وشوا برہمن طبقے کے ایک قائد کو اور ایروکولہ طبقے کے ایک قائد کو ایم ایل سی کے عہدے پر فائز کرنا چاہتے تھے۔

گورنر نے ایسے لوگوں کو مسترد کردیا ہے ان کی یہ حرکت باعث تعجب ہے۔ ٹی ہریش راؤ نے اخباری بیان میں کہا کہ تلنگانہ ریاست کے کمزور طبقے کے لوگ آئندہ انتخابات میں بی جے پی کو سبق سکھائیں گے۔

انہوں نے کہا کہ بی آر ایس ہمیشہ کمزور طبقات کی فلاح وبہبود کے کام کرے گی۔ انہوں نے کہا کہ اترپردیش میں بی جے پی کی حکومت نے بی جے پی قائدین کو کئی عہدے دیئے تھے۔

انہوں نے کہا کہ کے سی آر ایک اہم قائد ہیں جو تمام طبقات کی فلاح وبہبود کے لئے کام کرتے ہیں۔