آوارہ کتوں کا حملہ، اسکوٹی پر سوار 2 خواتین اور بچہ ہوا میں اُڑ کر گر پڑے، ویڈیو وائرل
اسکوٹی پر سوار ایک خاتون نے کہاکہ ہم صبح تقریباً 6 بجے مندر جارہے تھے کہ 6 سے 8 کتے ہمارا پیچھا کرنے لگے۔ میں نے اسکوٹی کی رفتار بڑھانے کا فیصلہ کیا، اگر نہیں تو کتے کاٹ لیتے۔
اوڈیشہ: اسکوٹی پر سوار ایک خاتون آوارہ کتوں کے تعاقب کے بعد حادثہ کاشکار ہوگئی۔ خاتون اسکوٹی چلارہی تھی کہ آوارہ کتوں نے اس کا پیچھا کیا۔ ایسے میں خاتون اسکوٹی پر سے کنٹرول کھو بیٹھی اور اسکوٹی ایک کارسے جاکر ٹکرا گئی۔ اسکوٹی پر کل تین لوگ سوار تھے جس میں ایک بچہ بھی تھا۔
خبررساں ایجنسی پی ٹی آئی کے بموجب یہ حادثہ پیر کو برہم پور میں پیش آیا۔ آوارہ کتوں نے خاتون کا پیچھا کیا جس کی وجہ سے خاتون اپنی توجہ کھوبیٹھی اور اس کی اسکوٹی سڑک کے کنارے پر کھڑے کار سے ٹکرا گئی۔
اس واقعہ کی ویڈیو سوشل میڈیا پر وائرل ہورہی ہے۔ تصادم کی وجہ سے اسکوٹی میں بیٹھے تمام لوگ ہوا میں اُچھل کر سڑک پر بری طرح گر گئے۔ حادثہ کے بعد کتے وہاں سے بھاگ گئے۔
پی ٹی آئی کے مطابق بچے اور دونوں خواتین کو متعدد چوٹیں آئی ہیں۔ خواتین کی شناخت سپریا اور سمیتا کے طورپر کی ہے۔
اسکوٹی پر سوار ایک خاتون نے کہاکہ ہم صبح تقریباً 6 بجے مندر جارہے تھے کہ 6 سے 8 کتے ہمارا پیچھا کرنے لگے۔ میں نے اسکوٹی کی رفتار بڑھانے کا فیصلہ کیا، اگر نہیں تو کتے کاٹ لیتے۔
دوسری جان خاتون کا کہنا تھا کہ اگر ہم بجلی کے کھمبے یا کسی اور چیز یا نالے میں گرجاتے تو حادثہ جان لیوا بھی ہوسکتا تھا۔
اسکوٹی پر سوار خاتون اور بچہ دونوں ہیلمٹ کے بغیر تھے۔ ایسے میں کی ٹویٹر صارفین نے ویڈیو پر تبصرہ کرتے ہوئے کہاکہ تینوں ہیلمٹ کے بغیر تھے، انہیں شدید چوٹ کا خطرہ زیادہ تھا۔ دیگر اور صارفین نے برہم پور میونسپل کارپوریشن کو ٹیگ کیا اور کارروائی کامطالبہ کیا۔
