حائیڈرا کی انہدامی کارروائی کے دوران غریب افراد خاندان کی خودکشی کی کوشش، رنگاناتھ مشرا کا بڑا اعلان

حیدرآباد: حیدرآباد میں حائیڈرا کی جانب سے جاری انہدامی کارروائیوں پر غریب اور متوسط طبقہ کے عوام میں شدید غم و غصہ پایا جاتا ہے۔ بغیر کسی پیشگی اطلاع کے مکانات کو مسمار کرنے پر عوام احتجاج کر رہے ہیں، جس میں بعض مقامات پر متاثرین نے خود پر پٹرول چھڑک کر خودکشی کی کوشش بھی کی۔ عوامی شکایات کا بنیادی نکتہ یہ ہے کہ انہیں اپنے گھروں کو بچانے کے لیے کوئی موقع نہیں دیا جا رہا۔

اس عوامی دباؤ کے پیش نظر، حائیڈرا کمشنر اے وی رنگناتھ نے ایک اہم اعلان کرتے ہوئے وضاحت کی کہ صرف نئے تعمیرات کو مسمار کیا جا رہا ہے، جبکہ پہلے سے آباد گھروں کو مسماری سے بچایا جائے گا۔ انہوں نے کہا کہ ایف ٹی ایل (فل ٹینک لیول) اور بفر زون میں مزید ڈھانچے کو نشانہ نہیں بنایا جائے گا۔

 اس بیان نے کچھ حد تک عوام میں پائی جانے والی بے چینی کو کم کیا ہے، لیکن پھر بھی یہ سوال اٹھایا جا رہا ہے کہ آیا حائیڈرا اپنی پالیسیوں پر نظرثانی کرے گا یا نہیں۔

اس دوران، شہر کے مختلف علاقوں میں انہدامی کارروائیاں دوبارہ شروع ہو چکی ہیں۔ مادھاپور چونا تالاب ایف ٹی ایل ایریا میں کئی مکانات کو مسمار کر دیا گیا، جس پر عوامی غصے کا اظہار جاری ہے۔ پولیس نے صورتحال کو قابو میں رکھنے کی کوشش کی، لیکن متاثرین کی جانب سے خودکشی کی کوششوں کے باعث حالات کشیدہ ہو گئے۔