سُکما دھماکہ حادثہ: زخمی چاروں سی آر پی ایف جوان حیدرآباد ریفر، ایک کی حالت تشویشناک

سکما: چھتیس گڑھ کے ضلع سکما میں دھماکہ خیز مواد کو ناکارہ بنانے کے دوران ہوئے حادثے میں زخمی مرکزی ریزرو پولیس فورس (سی آر پی ایف) کے چاروں جوانوں کو بہتر علاج کے لیے حیدرآباد ریفر کر دیا گیا ہے۔ ان میں ایک جوان کی حالت تشویشناک بتائی جا رہی ہے۔
ریاست کے نائب وزیر اعلیٰ اور وزیر داخلہ وجے شرما نے سوشل میڈیا پلیٹ فارم ‘ایکس’ پر معلومات شیئر کرتے ہوئے زخمی جوانوں کو حیدرآباد ریفر کیے جانے کی تصدیق کی ہے۔

موصولہ اطلاع کے مطابق جمعرات کو ضلع کے بھیجی تھانہ علاقے کے تحت ایلاڑمڈگو کیمپ کے قریب دھماکہ خیز مواد کے محفوظ ناکارہ بنانے کے دوران حادثہ پیش آیا تھا۔ حادثے میں سی آر پی ایف کے چار جوان زخمی ہو گئے تھے۔ تمام زخمیوں کو فوری طور پر کونٹا کمیونٹی ہیلتھ سینٹر پہنچایا گیا، جہاں ابتدائی طبی امداد کے بعد انہیں بہتر طبی سہولیات کے لیے تلنگانہ کے بھدراچلم ریفر کیا گیا تھا۔

اس کے بعد جوانوں کی صحتیابی کی صورتحال کو دیکھتے ہوئے چاروں کو حیدرآباد بھیجنے کا فیصلہ کیا گیا۔

قابل ذکر ہے کہ 8 اکتوبر کو سی آر پی ایف کی 50 ویں بٹالین کی گولہ بارود کی تکنیکی ٹیم جگدلپور سے کونٹا علاقے کے پڑمیل، ڈبا کونٹا، کولائی گوڑا اور ایلاڑمڈگو کیمپوں میں رکھے غیر مستعمل اور باقی ماندہ دھماکہ خیز مواد کے معائنے اور محفوظ تلفی کے لیے پہنچی تھی۔

ٹیم ایلاڑمڈگو کیمپ سے تقریباً 200 میٹر دور بودراجپدر نالے کے پاس دھماکہ خیز مواد کو ناکارہ بنانے کی کارروائی کر رہی تھی۔ اسی دوران حادثاتی طورپر اتفاقاً دھماکہ خیز مواد کا ایک حصہ پاس میں آ گرا اور اس میں دھماکہ ہونے سے چار جوان زخمی ہو گئے۔

حادثے میں زخمی جوانوں کی شناخت اسسٹنٹ سب انسپکٹر ایم کے تیواری، اسسٹنٹ سب انسپکٹر انیس خان، انسپکٹر امرناتھ مشرا اور ہیڈ کانسٹیبل کلدیپ راج کے طور پر ہوئی ہے۔ جمعرات کو جاری ابتدائی معلومات میں تیواری اور خان کو شدید چوٹیں آنے کی بات کہی گئی تھی۔

فی الحال چاروں جوانوں کے بہتر علاج کے انتظامات کیے جا رہے ہیں۔