سپریم کورٹ نے انل امبانی گروپ کی کمپنیوں کے ذریعہ بینک فراڈ کی جانچ پر سی بی آئی اور ای ڈی کی اسٹیٹس رپورٹ طلب کی
سپریم کورٹ نے انل امبانی سے اسٹیٹس رپورٹ طلب کی
نئی دہلی: سپریم کورٹ نے مرکزی تفتیشی بیورو(سی بی آئی) اور انفورسمنٹ ڈائریکٹوریٹ (ای ڈی) کو ہدایت دی ہے کہ وہ انل دھیروبھائی امبانی گروپ اور اس کے پروموٹر انل امبانی کی کمپنیوں سے متعلق مبینہ بینک دھوکہ دہی کے کیس میں جاری تحقیقات کی صورتحال سے متعلق رپورٹ سیل بند لفافے میں پیش کریں۔
چیف جسٹس سوریہ کانت اور جسٹس جوئمالیہ باگچی پر مشتمل بنچ نے سابق مرکزی سکریٹری ای اے ایس شرما کی جانب سے دائر مفادِ عامہ کی درخواست(پی آئی ایل) پر جمعہ کو سماعت کے بعد یہ ہدایت جاری کی۔ درخواست گزار کی جانب سے پیش ہونے والے وکیل پرشانت بھوشن کا موقف تھا کہ اس گروپ کی کمپنیوں پر واجب الادا 15 لاکھ کروڑ روپے سے زائد کے قرضوں کو مبینہ طور پر معاف کر دیا گیا اور کئی فرضی اداروں کے ذریعے رقم کا غبن کیا گیا۔ انہوں نے اسے ’’ملک کا سب سے بڑا بینک لون اسکینڈل‘‘ قرار دیا۔
مسٹر بھوشن نے عدالت کو بتایا کہ گزشتہ سال 18 نومبر کو نوٹس جاری کیے جانے کے باوجود امبانی گروپ کے ادارے اور انیل امبانی عدالت میں پیش نہیں ہوئے۔ انہوں نے کہا کہ اس معاملے کی بڑے پیمانے پر رپورٹنگ ہوئی ہے، اس لیے ایسا نہیں ہے کہ وہ عدالتی کارروائی سے لاعلم ہیں۔ عدم پیشی کا نوٹس لیتے ہوئے بنچ نے مشاہدہ کیا کہ نوٹس کی تعمیل کے باوجود جواب دہندگان حاضر نہیں ہوئے۔ انصاف کے مفاد میں عدالت نے انہیں آخری موقع دیتے ہوئے نیا نوٹس جاری کیا اور بمبئی ہائی کورٹ کے رجسٹرار جنرل کو نوٹس کی تعمیل کرانے کی ہدایت دی۔
