سپریم کورٹ نے مقدمے کی سماعت میں 4 سال کی تاخیر پر این آئی اے کی سرزنش کی

نئی دہلی: سپریم کورٹ نے چہارشنبہ کو ایک فوجداری معاملے کی سماعت کرتے ہوئے قومی تفتیشی ایجنسی (این آئی اے) کی سرزنش کرتے ہوئے کہا کہ الزام کی سنگینی کی وجہ سے جلد ٹرائل کے حق کی خلاف ورزی نہیں کی جا سکتی۔

جسٹس جے بی پارڈی والا اور اجل بھویان کی تعطیلاتی بنچ نے جعلی کرنسی سے متعلق ایک کیس کے ملزم درخواست گزار جاوید غلام نبی شیخ کی طرف سے دائر درخواست کی سماعت کرتے ہوئے یہ تبصرہ کیا، جس میں بامبے ہائی کورٹ کے اس حکم کو چیلنج کیا گیا تھا جس میں اسے ضمانت دینے سے انکار کر دیا گیا تھا۔

بنچ نے پچھلے چار برسوں سے بغیر مقدمہ چلائے جیل میں بند شیخ کے خلاف کیس کی مزید سماعت میں تاخیر کرنے پر این آئی اے کی سرزنش کی اور ملزم کو ضمانت دے دی۔ شیخ کے خلاف غیر قانونی سرگرمیاں (روک تھام) ایکٹ اور دیگر سنگین دفعات کے تحت مقدمہ درج کیا گیا ہے۔

بنچ نے سماعت میں تاخیر پر ناراضگی کا اظہار کیا اور کہا، “آپ این آئی اے ہیں۔ برائے مہربانی انصاف کا مذاق نہ اڑائیں۔ چار سال ہو گئے ہیں اور کیس کی سماعت شروع نہیں ہوئی۔ ایسا نہیں کیا جانا چاہیے۔‘‘

سپریم کورٹ نے کہا کہ فوری ٹرائل کا آئینی حق مبینہ جرم کی سنگینی پر منحصر نہیں ہو سکتا۔ عدالت نے کہا کہ ملزم نے جو بھی جرم کیا ہو، اسے فوری ٹرائل کا حق حاصل ہے۔

بنچ نے کہا، ’’جرم چاہے کتنا ہی سنگین کیوں نہ ہو، ملزم کو آئین کے تحت تیز رفتار ٹرائل کا حق حاصل ہے۔ ہمیں یقین ہے کہ عدالت اور استغاثہ کی ایجنسی نے جس انداز میں اس کیس کو چلایا ہے اس سے تیز رفتار ٹرائل کے حق کو دھچکا لگا ہے۔ اس معاملے میں آئین کے آرٹیکل 21 کی خلاف ورزی کی گئی ہے۔

ممبئی پولیس نے شیخ کو 2020 میں گرفتار کیا تھا، جس کے بعد اس سے مبینہ طور پر پاکستان سے آئے جعلی نوٹ برآمد ہوئے تھے۔ اس کے بعد این آئی اے نے کیس کو اپنے ہاتھ میں لے لیا تھا۔

عدالت عظمیٰ نے شیخ کی اپیل پر غور کرتے ہوئے مشاہدہ کیا کہ ان کے دو ساتھی ملزمان کو پہلے ہی ضمانت مل چکی ہے، جن میں سے ایک کی ضمانت کے احکامات کو فی الحال سپریم کورٹ میں چیلنج کیا جا رہا ہے، لیکن ضمانت پر کوئی روک نہیں ہے۔