بلدی اداروں میں معلق صورتحال۔کارپوریٹرس کو لالچ اورپولیس دباو۔ کے ٹی راما راو کا الزام

حیدرآباد: بی آر ایس کے کارگزار صدر کے ٹی راما راؤ نے اس عزم کا اعادہ کیا کہ سنگارینی کالریز کوئلہ کی کانوں کے ورکرس کے حقوق اور مفادات کے تحفظ کے لئے ان کی پارٹی کی جدوجہد سیاسی وابستگیوں سے بالاتر ہو کر جاری رہے گی۔

پارٹی ہیڈ کوارٹرس تلنگانہ بھون میں سنت سیوالال مہاراج کی 287 ویں یومِ پیدائش کی تقریب میں شرکت کے بعد میڈیا سے بات کرتے ہوئے انہوں نے سنگارینی کالریز، بلدی سیاست اور قبائلی بہبود کے سلسلہ میں اظہارِ خیال کیا۔

کے ٹی آر نے واضح کیا کہ بی آر ایس نے بھدرادری کوتہ گوڑم میں سی پی آئی کی تائید صرف اس لئے کی تھی تاکہ کانگریس کو سنگارینی کا استحصال کرنے سے روکا جا سکے تاہم انہوں نے الزام لگایا کہ کانگریس اور بی جے پی دونوں ہی اس ادارہ کے لئے نقصان دہ ثابت ہو رہے ہیں۔

ریاست کے 34 مقامات پر بلدی اداروں میں معلق صورتحال پر ردعمل دیتے ہوئے انہوں نے الزام لگایا کہ کانگریس قائدین کارپوریٹرس کو لالچ دینے، پولیس کے دباؤ اور دھمکیوں جیسے ہتھکنڈے استعمال کر رہے ہیں۔

سنت سیوالال مہاراج جینتی کی شاندار تقریب پر مسرت کا اظہار کرتے ہوئے کے ٹی آر نے کہا کہ تلنگانہ بھون میں یہ جشن قبائلی خودداری کے لئے بی آر ایس کے عزم کی عکاسی کرتا ہے۔

انہوں نے مزید کہا کہ بی آر ایس حکومت نے جل، جنگل اور زمین کے جذبہ کے تحت قبائلیوں کے تحفظ، ریزرویشن میں 10 فیصد تک اضافہ اور تعلیمی وظائف کے ذریعہ ان کی زندگیوں میں انقلاب لایا ہے۔ کے ٹی آر نے عوام کو مہا شیوراتری کی مبارکباد بھی پیش کی۔