کاچی گوڑہ ریلوے ٹریکس کے قریب لاوارث مشکوک گاڑی سے پھیلی سنسنی، بم اسکواڈ کی فوری کارروائی
حیدرآباد: کاچی گوڑہ ریلوے ٹریک کے قریب جمعرات کی شام اس وقت سنسنی پھیل گئی جب ٹریک کے بالکل پاس ایک گاڑی مشکوک حالت میں کھڑی پائی گئی۔ دہلی میں حالیہ دھماکوں کے بعد ملک بھر میں جاری ہائی الرٹ کے درمیان اس واقعے نے پولیس کو مزید چوکس کر دیا۔
تفصیلات کے مطابق یہ گاڑی، جو بالاجی کے نام پر رجسٹرڈ ہے، ریلوے ٹریک کے پل کے نیچے بغیر کسی معلومات کے چھوڑ دی گئی تھی۔ گاڑی میں مشتبہ اشیاء کی موجودگی کا شبہ ہونے پر پولیس نے فوری طور پر علاقے کو گھیرے میں لے لیا اور ٹریک کے آس پاس آمدورفت روک دی۔
بم اسکواڈ اور اسنیفر ڈاگ ٹیمیں فوراً موقع پر پہنچ گئیں اور گاڑی سمیت آس پاس کے علاقے کی باریک بینی سے تلاشی لی گئی۔ مکمل جانچ کے بعد حکام نے تصدیق کی کہ گاڑی میں کوئی دھماکہ خیز مواد یا خطرناک چیز موجود نہیں تھی۔
اس واقعے کی وجہ سے کچھ دیر کے لیے مقامی لوگوں اور مسافروں میں خوف و ہراس پھیل گیا، تاہم پولیس نے بعد میں واضح کیا کہ صورتحال قابو میں ہے اور کوئی خطرہ نہیں پایا گیا۔
