تلنگانہ: شادی سے واپسی کے دوران گاڑی حادثہ کا شکار ہوگئی۔ 4افرادہلاک اور20 سے زائد زخمی

حیدرآباد: شادی سے واپسی کے دوران گاڑی حادثہ کا شکار ہوگئی جس کے نتیجہ میں 4افرادہلاک اور20 سے زائد زخمی ہو گئے۔یہ حادثہ تلنگانہ کے وقارآباد ضلع کے پرگی علاقہ کی قومی شاہراہ 163 کے قریب رنگا پور کے مقام پر آج صبح پیش آیا۔

ذرائع کے مطابق پرائیویٹ ٹراویلس کی بس، بارات کو لے جارہی تھی کہ اس کے ڈرائیور نے توازن کھودیا اوریہ بس سڑک کے کنارے کھڑی ایک لاری سے ٹکرا گئی۔

اس حادثہ میں چار افراد موقع پر ہی ہلاک ہو گئے جبکہ 20 سے زائد زخمی ہو گئے۔ زخمیوں میں سے 6 کی حالت تشویشناک ہے۔ ہلاک ہونے والوں کی شناخت ملیش، سندیپ، بالامنی اور ہیم لتاکے طورپر کی گئی ہے۔

پولیس اطلاع ملتے ہی جائے حادثہ پر پہنچ گئی اور زخمیوں کو فوری طور پر قریبی اسپتال منتقل کیا گیا۔ بتایا گیا ہے کہ یہ افراد شادی کی تقریب میں شرکت کے بعد واپس جا رہے تھے۔

تمام مسافر رنگا ریڈی ضلع کے شاد نگر منڈل کے چندن ویلی گاؤں کے رہنے والے تھے۔ پولیس نے مقدمہ درج کر کے تحقیقات شروع کر دی ہیں۔