سوشیل میڈیا

تلنگانہ: صرف 8.8 مربع گز اراضی پر دومنزلہ انوکھے مکان کی تعمیر

شہر کے مضافاتی علاقہ رنگا ریڈی ضلع کے حیات نگر منڈل کے کنٹلورو میں ایک شخص نے اپنی اراضی فروخت کردی جس کے بعد اس کے پاس 8.8 گز زمین ہی باقی رہ گئی۔

حیدرآباد: گریٹرحیدرآباد میونسپل کارپوریشن (جی ایچ ایم سی) اورنواحی حدود میں اراضیات کی قیمتیں آسمان کو چھورہی ہیں۔ بعض مقامات پر تو اراضیات کی قیمت لاکھوں اور کروڑوں میں ہے جس کے پیش نظراراضیات کے مالکین ہر ایک گز زمین کو استعمال کرنے کے بارے میں سوچتے ہیں۔

شہر کے مضافاتی علاقہ رنگا ریڈی ضلع کے حیات نگر منڈل کے کنٹلورو میں ایک شخص نے اپنی اراضی فروخت کردی جس کے بعد اس کے پاس 8.8 مربع گز زمین ہی باقی رہ گئی تھی۔

اس جگہ پر ایک دو منزلہ عمارت تعمیر کی گئی جس کی چوڑائی اگلے حصے میں 6 فٹ، پیچھے 2 فٹ اور لمبائی 20 فٹ ہے۔

گراؤنڈ فلور پر ایک چھوٹا سا دفتر اور اوپر ایک اٹیچ باتھ روم کے ساتھ کمرہ بنایا گیا ہے۔

یہ ایک طرف سے دیوار کی طرح لگتا ہے لیکن یہ ایک دو منزلہ مکان ہے۔

اس انوکھے مکان کو دیکھنے کیلئے عوام کی بڑی تعداد جمع ہورہی ہے۔