تلنگانہ: دریائے گوداوری کی سطح میں اضافہ کاسلسلہ جاری

حیدرآباد: تلنگانہ کے بھدرادری کوتہ گوڑم ضلع کے بھدراچلم میں دریائے گوداوری کا پانی مسلسل بڑھتے ہوئے کل رات 10 بجے 48 فٹ تک پہنچ گیا، جس پر حکام نے دوسرا خطرہ کا انتباہ جاری کیا۔ فی الحال گوداوری 50.3 فٹ کی سطح پر بہہ رہی ہے اور دریا کے بہاؤ سے 11,44,645 کیوسیکس پانی نیچے کی طرف چھوڑا جا رہا ہے۔

گوداوری میں بڑھتی ہوئی طغیانی کے پیشِ نظر وزیر سرینواس ریڈی، کلکٹر جیتیش وی پاٹل، ایس پی روہت راج اور آئی ٹی ڈی اے پی او راہل نے متاثرہ دیہات کے عوام کو چوکنا رہنے کی اپیل کی۔

کلکٹر نے بتایا کہ انتظامیہ پہلے ہی بازآبادکاری کے اقدامات شروع کرچکی ہے اور ضرورت پڑنے پر مزید مراکز قائم کرنے کے لیے تیار ہے۔ عوام کو پینے کا پانی، کھانا، طبی سہولیات اور بجلی کی فراہمی یقینی بنانے کے لیے متعلقہ محکموں کو ہدایات دی گئی ہیں۔

کلکٹر کے احکامات پر ریونیو، پولیس، طبی، پنچایت راج، میونسپل اور بجلی محکموں کے عہدیدار متاثرہ علاقوں میں مسلسل نگرانی کر رہے ہیں اور کسی بھی ہنگامی صورتحال میں فوری مدد کے لیے تیار ہیں۔ عوام کو سختی سے ہدایت دی گئی ہے کہ وہ گوداوری میں ہرگز نہ اتریں، نہ ہی نہائیں اور کشتیاں چلانا مکمل طور پر ممنوع ہے۔

سیلابی پانی سے بھرے پلوں، تالابوں، نالوں اور نہروں کے قریب نہ جانے کی تلقین کی گئی ہے۔ کلکٹر نے بتایا کہ عوام کو فوری سہولت پہنچانے کے لیے خصوصی کنٹرول روم قائم کیے گئے ہیں۔