تلنگانہ: آپریشن کے دوران پیٹ میں سوئی چھوڑنے کا واقعہ، ڈاکٹروں کی لاپرواہی بے نقاب

حیدرآباد: تلنگانہ کے کریم نگر ضلع کے حضورآباد سرکاری اسپتال میں ڈاکٹروں کی لاپرواہی کا ایک سنسنی خیز واقعہ سامنے آیا ہے۔ جمّی کنٹہ سے تعلق رکھنے والی ایک حاملہ خاتون زچگی کے لیے ایریا اسپتال پہنچی تھیں۔

آپریشن کے دوران ڈاکٹروں نے لاپرواہی سے کام لیتے ہوئے سوئی کو پیٹ کے اندر چھوڑ دیا۔ جب سرجری مکمل ہونے کے بعد سوئی نہ ملنے پر شبہ ہوا تو ڈاکٹروں نے فوری طور پر خاتون کا ایکسرے کیا۔

ایکسرے میں سوئی پیٹ کے اندر نظر آنے کے بعد ڈاکٹروں نے دوبارہ ٹانکے کھول کر سوئی باہر نکالی اور دوبارہ سلائی کی۔

یہ واقعہ تین دن بعد سامنے آیا جس پر وضاحت دیتے ہوئے اسپتال کے سپرنٹنڈنٹ نارائن ریڈی نے کہا کہ ’’یہ کوئی بڑی غلطی نہیں تھی، سوئی آخری مرحلہ میں پیٹ میں گر گئی تھی، جسے فوراً نکال دیا گیا۔‘‘

انہوں نے کہا کہ کچھ لوگ جان بوجھ کر اسپتال کی شبیہ کو خراب کرنے کی کوشش کر رہے ہیں۔
متاثرہ خاتون نے بھی تصدیق کی کہ اسے کوئی تکلیف نہیں ہے اور اس کی صحت اب مکمل طور پر مستحکم ہے۔