تلنگانہ: 1400 کروڑ روپئے کا جی ایس ٹی اسکام۔ سابق چیف سکریٹری کے خلاف مقدمہ درج

حیدرآباد: حیدرآباد پولیس نے کہا ہے کہ تلنگانہ کے سابق چیف سکریٹری سومیش کمار کے ساتھ چار دیگر ملزمین کے خلاف کئی کمپنیوں کے ذریعہ 1,400 کروڑ روپئے سے زیادہ کی جی ایس ٹی کی چوری سے متعلق اسکام میں مقدمہ درج کیا گیا ہے۔

پولیس نے کہا کہ سابق چیف سکریٹری نے مبینہ طور پر آئی آئی ٹی۔حیدرآباد کی جانب سے ٹیکس ڈپارٹمنٹ کے ڈیزائن کردہ جانچ کے طریقہ کارمیں تبدیلی کے احکام جاری کرتے ہوئے بعض کمپنیوں کی کمپنیوں کی حمایت کی، جس سے بے قاعدگیوں کا پتہ نہیں چل سکا۔

سومیش کمار کا نام ایف آئی آر میں، کمرشل ٹیکس کے ایڈیشنل کمشنر ایس وی کاسی وشواسوارا راؤ، ڈپٹی کمشنر (حیدرآباد رورل) شیورام پرساد، آئی آئی ٹی حیدرآباد کے اسسٹنٹ پروفیسر سوبھن بابو، کے ساتھ درج کیاگیا ہے۔

سی سی ایس نے یہ بات بتائی۔کمرشل ٹیکس کے جوائنٹ کمشنر روی کنورو کی طرف سے جی ایس ٹی کی ہزاروں کروڑ کی چوری کے بارے میں درج شکایت کی بنیاد پر، سی سی ایس نے سومیش کمار کو ملزم نمبر 5بنایا ہے۔

اسکام میں ملوث افراد کے خلاف آئی پی سی کی دفعہ 406، 409، اور 120 بی کے ساتھ آئی ٹی ایکٹ کے تحت مقدمہ درج کیا گیا ہے۔

ایف آئی آر کے مطابق، کمرشل ٹیکس آفس کی جانب سے کی گئی ابتدائی تحقیقات میں صرف اسٹیٹ بیوریجس کارپوریشن سے جی ایس ٹی میں 1,000 کروڑ روپے کے نقصان کا انکشاف ہوا، اور 400 کروڑ روپے 11 دیگر کمپنیوں کے ذریعہ چوری کیے گئے۔

تقریباً 75 کمپنیاں بے ضابطگیوں میں قصوروار پائی گئی ہیں۔ اسٹیٹ بیوریجس کارپوریشن کے ریکارڈ کے فارنسک آڈٹ کے دوران اس اسکام کا پردہ فاش ہوا۔