شاہ علی بنڈہ گومتی الیکٹرانکس میں لگی خوفناک آگ، دھماکوں سے علاقہ لرز اٹھا

حیدرآباد: شاہ علی بنڈہ میں واقع گومتی الیکٹرانکس میں پیر کی شام بڑے پیمانے پر آگ بھڑک اٹھی، جس کے نتیجے میں دکان میں موجود متعدد برقی آلات میں لگاتار دھماکے ہونے لگے۔ شدید گرمی کے باعث کئی اے سی اور واشنگ مشین کے کمپریسرز کے پھٹنے کی اطلاعات موصول ہوئی ہیں۔

آگ لگتے ہی گھنا دھواں اور بلند شعلے پوری عمارت میں پھیل گئے، جس سے علاقے میں گھبراہٹ پیدا ہوگئی۔ فائر بریگیڈ کے عملے نے فوری طور پر موقع پر پہنچ کر آگ پر قابو پانے کی کوششیں شروع کیں اور آگ کو قریبی دکانوں اور رہائشی عمارتوں تک پھیلنے سے روکنے کی کوشش جاری ہے۔

صورتحال کی سنگینی کے پیش نظر پولیس نے چارمینار–چندریان گٹہ مین روڈ کو عارضی طور پر بند کردیا اور ٹریفک کو متبادل راستوں کی طرف موڑ دیا۔ یہ سڑک پرانے شہر کی مصروف ترین شاہراہوں میں شمار ہوتی ہے۔

مسلسل دھماکوں اور گھنے دھوئیں کے باعث قریبی عمارتوں کے رہائشیوں کو احتیاطی طور پر خالی کرایا جا رہا ہے تاکہ کسی بڑے حادثے سے بچا جاسکے۔

آگ لگنے کی وجہ اور کسی جانی نقصان کے بارے میں ابھی مزید تفصیلات کا انتظار ہے۔ فائر فائٹنگ آپریشن بدستور جاری ہے۔