چلتی ٹرین سے اُترنے کی کوشش، خاتون کانسٹبل نے مسافر خاتون کی جان بچالی
خاتون مسافر، تیزی کے ساتھ چلتی ٹرین سے اترنے کی کوشش کررہی تھی تاہم وہ اپنی اس کوشش کے دوران پلیٹ فارم پر گرپڑی۔
حیدرآباد: تلنگانہ کے ضلع ورنگل میں ریلوے پروٹکشن فورس(آرپی ایف) کی خاتون کانسٹبل نے اپنی چوکسی اوربہادری کا مظاہرہ کرتے ہوئے ایک مسافر کی جان بچائی جو چلتی ٹرین سے اترنے کے دوران حادثہ کاشکار ہوگئی تھی۔
یہ واقعہ ورنگل اسٹیشن پر اُس وقت پیش آیا جب بھدراچلم سے سکندرآباد جانے والی منگورو ایکسپریس ٹرین کل شب پہنچی تھی۔ذرائع کے مطابق خاتون مسافر، تیزی کے ساتھ چلتی ٹرین سے اترنے کی کوشش کررہی تھی تاہم وہ اپنی اس کوشش کے دوران پلیٹ فارم پر گرپڑی۔
اس کا ہاتھ ڈور ہینڈل میں پھنس گیا اور کچھ فاصلہ تک ٹرین اس کو گھسیٹتے ہوئے لے گئی۔اس پر فوری طورپر چوکسی کامظاہرہ کرتے ہوئے خاتون کانسٹیبل جس کی شناخت سونالی کے طورپر کی گئی ہے اس مسافر کے پاس پہنچی اور اس کو بچانے کے لئے اس کے پیر کو کھینچا اور اس کو جان کے خطرہ کی صورتحال سے بچانے میں کامیابی حاصل کی۔
عہدیداروں نے خاتون کانسٹیبل کی چوکسی اور فرائض کی بہتر طورپر انجام دہی پر سونالی کی ستائش کی۔
