فلم دی کیرالہ اسٹوری پر جموں کے ہاسٹل میں ہاتھا پائی، ایک طالب علم زخمی (ویڈیو)

جموں: فلم دی کیرالہ اسٹوری پر گورنمنٹ میڈیکل کالج جموں کے ہاسٹل میں دو گروپوں کے درمیان ہاتھاپائی ہوئی جس کے دوران ایک طالب علم کے زخمی ہونے کی اطلاع موصول ہوئی ہے۔

پولیس ذرائع نے بتایا کہ فلم دی کیرالہ اسٹوری پر گورنمنٹ میڈیکل کالج جموں کے بوائز ہاسٹل کے اندر دو گروپوں کے درمیان ہاتھا پائی شروع ہوئی جس نے جھگڑے کا رخ اختیار کرلیا۔

انہوں نے بتایا کہ اس آپسی لڑائی میں ایک طالب علم زخمی ہوا جس کو علاج ومعالجہ کی خاطر نزدیکی ہسپتال منتقل کیا گیا۔ ان کے مطابق پولیس نے فوری کارروائی عمل میں لا کر دونوں گروپوں کو پر امن طورپر منتشر کیا۔

ایس ایس پی جموں چندن کوہلی نے بتایا کہ گورنمنٹ میڈیکل کالج جموں کے ہوسٹل میں کچھ طلبا کے درمیان لڑائی ہوئی۔ ان کے مطابق معاملے کو سنجیدگی سے لیتے ہوئے کیس درج کرکے تحقیقات شروع کی گئی ۔

دریں اثناء پیر کے روز گورنمنٹ میڈیکل کالج جموں میں طلبا نے کلاسوں کا بائیکاٹ کرکے احتجاجی مظاہرے کئے۔

انہوں نے بتایا کہ باہر سے کچھ لوگوں کو بلایا گیا جنہوں نے ہاسٹل میں نعرہ بازی شروع کی اور ایک طالب علم کے سر پر وار کیا جس وجہ سے وہ شدید طورپر زخمی ہوا ہے۔

ان کے مطابق پولیس کو معاملے کا سخت نوٹس لیتے ہوئے ملوثین کے خلاف کارروائی عمل میں لانی چاہئے۔ انہوں نے مزید بتایا کہ کالج کے پر امن ماحول کو خراب کرنے کی خاطر ایسا کیا گیا جو ناقابل برداشت ہے۔

معلوم ہوا ہے کہ گورنمنٹ میڈیکل کالج کی پرنسپل ششی سودھان شرما جائے موقع پر پہنچی اور احتجاجی طلبا کو یقین دلایا کہ ملوثین کے خلاف سخت کارروائی ہوگی۔