ٹویٹر نے پی ایف آئی کا اکاؤنٹ بند کردیا

نئی دہلی: پاپولر فرنٹ آف انڈیا (پی ایف آئی) کا ٹویٹر اکاؤنٹ، ٹویٹر نے بند کردیا ہے۔ حکومت کی طرف سے کل پی ایف آئی پر پابندی عائد کئے جانے کے بعد ٹویٹر نے اس کا آفیشیل ٹویٹر اکاؤنٹ بند کردیا ہے۔ تنظیم کے علاوہ تنظیم کے مختلف قائدین کے بھی ٹویٹر اکاؤنٹ بند کردیئے گئے ہیں جبکہ پی ایف آئی کا فیس بک پیج اور انسٹاگرام پروفائل بھی اب دستیاب نہیں ہیں۔

  تنظیم کے اکاؤنٹ،@PFIofficial  کے تقریباً 81ہزار فالورز تھے۔ ٹویٹر نے تنظیم کے چیئرپرسن او ایم اے سلام (@oma_salam)  کا ہینڈل بھی مسدود کردیا ہے، جن کے صرف 50 ہزار فالوورز تھے۔

جنرل سیکریٹری انیس احمد (@AnisPFI)، جن کے تقریباً 85,000 فالوورز تھے کا بھی اکاؤنٹ بند کردیا گیا ہے۔  یہ دونوں ان 200 سے زائد پی ایف آئی لیڈروں میں شامل ہیں جنہیں گزشتہ دو ہفتوں کے دوران ملک بھر میں چھاپوں میں گرفتار کیا گیا ہے۔

واضح رہے کہ مرکزی وزارت داخلہ کی جانب سے چہارشنبہ 27 ستمبر کو پی ایف آئی اور اس کی محاذی تنظیموں پر پابندی عائد کئے جانے کے بعد ایک دن بعد ہی سوشیل میڈیا کے بڑے پلیٹ فارمس نے اس تنظیم کے اکاؤنٹس اور پروفائلس بند کردیئے ہیں۔

نیشنل انوسٹی گیشن ایجنسی، جو پورے ہندوستان میں اہمیت کے معاملات کی تحقیقات کرتی ہے، اور انفورسمنٹ ڈائریکٹوریٹ، جو کہ غیر قانونی رقم کا سراغ لگاتی ہے، نے الزام لگایا ہے کہ پی ایف آئی کے اسلامک اسٹیٹ دہشت گرد گروپ کے ساتھ تعلقات ہیں اور اس نے ہتھیاروں کے تربیتی کیمپ بھی منعقد کئے ہیں۔

پی ایف آئی، جس کا اسٹوڈنٹ ونگ کیمپس فرنٹ آف انڈیا، تنظیم پر پابندی کے خلاف عدالت جانے کا ارادہ رکھتا ہے، نے ان الزامات کی تردید کی لیکن حکومتی کارروائی کے بعد اس نے اپنے یونٹوں کو مکمل طور پر تحلیل کردیا ہے۔

غیر قانونی سرگرمیاں (روک تھام) ایکٹ (یو اے پی اے) کے تحت پابندی کی زد میں آنے والی پی ایف آئی کی محاذی تنظیموں میں ری ہیب انڈیا فاؤنڈیشن، کیمپس فرنٹ آف انڈیا، آل انڈیا امامس کونسل، نیشنل کنفیڈریشن آف ہیومن رائٹس آرگنائزیشن، نیشنل ویمن فرنٹ، جونیئر فرنٹ، ایمپاور انڈیا فاؤنڈیشن اور ری ہیب فاؤنڈیشن، کیرالہ شامل ہیں۔

پی ایف آئی کی ایک سیاسی شاخ، سوشل ڈیموکریٹک پارٹی آف انڈیا (ایس ڈی پی آئی)، جو اس فہرست میں شامل نہیں ہے، نے کہا کہ یہ پابندی ہندوستانی جمہوریت اور آئین کے ذریعے دی گئی شہریوں کے حقوق کے لئے ایک چیلنج ہے۔