جموں میں پاکستانی فوج کی بلا اشتعال فائرنگ

جموں: بارڈر سیکورٹی فورس (بی ایس ایف) کا کہنا ہے کہ پاکستانی فوج نے گذشتہ شام جموں کے رنبیر سنگھ پورہ سیکٹر میں بین الاقوامی سرحد پر جنگ بندی معاہدے کی خلاف ورزی کرکے بلا اشتعال فائرنگ کی جس کا بھر پور جواب دیا گیا۔

بی ایس ایف کے ایک ترجمان نے بتایا کہ جموں میں آر ایس پور سیکٹر میں بدھ کی شام قریب ساڑھے پانچ بجے پاکستانی فوج نے بلا اشتعال فائرنگ کی۔

انہوں نے کہا کہ وہاں موجود جوانوں نے پاکستانی فائرنگ کا بھر پور جواب دیا۔ ان کا کہنا تھا کہ فائرنگ کا یہ سلسلہ سوا چھ بجے شام تک جاری رہا۔

ترجمان نے بتایا کہ اس واقعے کے بعد سرحد پر فوج کو الرٹ پر رکھا گیا ہے۔ بتادیں کہ بین الاقوامی سرحد پر یہ واقعہ قریب تین مہینوں کے خاموشی کے بعد پیش آیا ہے۔