لاٹھی چارج، پولیس ملازمین کو معطل کرنے حکومت کو وی ایچ پی کا 48 گھنٹوں کا الٹی میٹم

حیدرآباد (منصف نیوز ڈیسک) سکندرآباد کی متیالماں مندر میں مورتی کو نقصان پہونچانے کے خلاف احتجاج منظم کرنے والے وی ایچ پی، بجرنگ دل اور دیگر ہندو تنظیموں کے کارکنوں پر پولیس لاٹھی چارج کے ایک دن بعد وشواہندوپریشد(وی ایچ پی) نے اتوار کے روز حکومت تلنگانہ کو لاٹھی چارج کرنے والے پولیس ملازمین کو خدمات سے معطل کرنے 48 گھنٹوں کا الٹی میٹم دیا ہے۔

وی ایچ پی کے ریاستی چیف ترجمان بالاسوامی نے کہاکہ ریاستی حکومت ہندوؤں پر حملہ کررہی ہے۔ چیف منسٹر ریونت ریڈی نے مندر میں مورتی کی بے حرمتی واقعہ پر اب تک کوئی بیان نہیں دیا ہے۔

جس شخص نے مورتی کو نقصان پہونچایا ہے وہ دہشت گرد ہے۔ اس واقعہ میں ملوث افراد کو گرفتار کرنے میں تلنگانہ پولیس نے کوئی قدم نہیں اُٹھایا ہے۔ پولیس نے وی ایچ پی اور بجرنگ دل کارکنوں پر لاٹھی چارج کیا۔

اُنہوں نے کہاکہ حکومت تلنگانہ کو ہم 48 گھنٹوں کا الٹی میٹم دے رہے ہیں وہ ان پولیس عہدیداروں کو خدمات سے معطل کریں جو مندر کے باہر احتجاج کرنے والوں پر لاٹھی چارج کرنے میں ملوث ہیں۔