اروناچل پردیش میں لوک سبھا اور اسمبلی انتخابات کے لئے ووٹنگ جاری

ایٹا نگر: اروناچل پردیش میں 18ویں لوک سبھا اور 11ویں ریاستی اسمبلی کے بیک وقت ہونے والے انتخابات کے لئے سخت سیکورٹی کے درمیان جمعہ کو ووٹنگ شروع ہوئی۔ مرکزی وزیر کرن رجیجو دوسری بار اروناچل ویسٹ سے انتخابی میدان میں اترے ہیں۔

ریاست کی 50 اسمبلی سیٹوں اور دو پارلیمانی حلقوں کے لیے ووٹنگ آج صبح 7 بجے شروع ہوئی اور شام 5 بجے تک جاری رہے گی۔

50 اسمبلی سیٹوں کے لیے کل 133 امیدوار میدان میں ہیں (جن میں سے 10 ممبران پہلے ہی بلامقابلہ منتخب ہو چکے ہیں) اور 14 امیدوار دو لوک سبھا سیٹوں کے لیے قسمت آزما رہے ہیں۔

ریاست میں کل 8,92,694 ووٹر ہیں، جن میں خواتین ووٹرز کی تعداد 4,54,256 اور مرد ووٹرز کی تعداد 4,38,433 ہے۔ اس کے علاوہ پانچ ٹرانس جینڈر ووٹر بھی ہیں، جو ریاست کے 2,226 پولنگ اسٹیشنوں پر اپنا حق رائے دہی استعمال کریں گے۔

ایم ایل اے پہلے ہی ایٹا نگر اسمبلی حلقہ میں بلا مقابلہ منتخب ہو چکے ہیں۔ اروناچل مغربی لوک سبھا سیٹ کے لیے ووٹنگ ہو رہی ہے، جہاں مرکزی وزیر اور بی جے پی کے امیدوار کرن رجیجو اور کانگریس کے نبام توکی سمیت آٹھ امیدوار میدان میں ہیں۔

اسمبلی انتخابات کے ووٹوں کی گنتی 4 جون کو لوک سبھا انتخابات کے نتائج کے اعلان سے دو دن قبل 2 جون کو ہوگی۔