ہریانہ کے تمام اضلاع میں آندھی اور بارش کا یلو الرٹ جاری

چنڈی گڑھ: ہریانہ میں منگل کی صبح کئی اضلاع میں بارش درج کی گئی۔ محکمہ موسمیات نے ریاست کے تمام 23 اضلاع کے لیے آندھی اور بارش کا یلو الرٹ جاری کیا ہے۔ محکمہ کے مطابق اگلے تین دنوں تک ریاست کے لوگوں کو گرمی سے راحت مل سکتی ہے اور کئی علاقوں میں بارش کا امکان ظاہر کیا گیا ہے۔

پیر کو بھی ریاست کے 10 اضلاع میں آندھی، طوفان اور بارش کا اثر دیکھنے کو ملا۔ ہانسی میں تیز آندھی کے سبب ایک موبائل ٹاور گر گیا، جبکہ ایک مکان کی دیوار گرنے سے ایک شخص کی موت ہو گئی۔

حصار، سرسا، بھوانی، روہتک، مہندر گڑھ، ریواڑی، سونی پت اور پانی پت میں دھول بھری آندھی سے معمولات زندگی متاثر رہے۔ بھوانی کے سوانی علاقہ میں تقریباً 100 میٹر اونچا دھول کا غبار اٹھتا دکھائی دیا، جس نے لوگوں کی توجہ اپنی جانب مبذول کرائی۔ منگل کی صبح سونی پت، حصار، مہندر گڑھ، ہانسی، کیتھل، روہتک اور فتح آباد میں بھی بارش درج کی گئی۔

محکمہ موسمیات کے مطابق، یکم جون سے 15 جون کے درمیان ہریانہ میں اوسطاً 20.3 ملی میٹر بارش ریکارڈ کی گئی ہے، جو اس مدت کی معمول کی بارش 17.3 ملی میٹر سے زیادہ ہے۔

بار بار سرگرم ہو رہے مغربی خلل کے سبب پلول، ریواڑی، فتح آباد اور کروکشیتر جیسے اضلاع میں معمول سے زیادہ بارش ہوئی ہے۔

موسم کے ماہرین کا کہنا ہے کہ پری-مانسون سرگرمیوں کے سبب درجہ حرارت میں کمی آئی ہے اور کسانوں کے ساتھ ساتھ عام لوگوں کو بھی گرمی سے راحت ملی ہے۔ اگرچہ تیز ہواؤں اور آندھی کے پیش نظر لوگوں کو محتاط رہنے کی صلاح دی گئی ہے۔