سرکاری ملازمت نہ ملنے پر نوجوان کی خودکشی

حیدرآباد: تلنگانہ کے ضلع منچریال کے چنور ٹاون میں ایک دل دہلا دینے والا واقعہ سامنے آیا ہے جہاں سرکاری ملازمت کے ایک امید وار نے سخت محنت اور طویل جدوجہد کے باوجود کامیابی نہ ملنے پر دلبرداشتہ ہو کر خودکشی کر لی۔

پولیس کے مطابق کوٹہ بوگوڈا کالونی کے رہنے والے24 سالہ کرن نے سرکاری ملازمت حاصل کرنے میں ناکامی اور بے روزگاری سے تنگ آکر 19 فروری کو زہریلی دوا پی لی تھی۔

اسے فوری طور پر منچریال کے ایک اسپتال منتقل کیا گیا جہاں اس کی موت ہوگئی۔

کرن کے بھائی کی جانب سے درج کرائی گئی شکایت کے مطابق کرن کا خواب سرکاری ملازم بننا تھا اور اس مقصد کے لئے اس نے حیدرآباد میں بھاری رقم خرچ کر کے گروپ فورامتحانات کی خصوصی کوچنگ بھی لی تھی۔

گریجویٹ ہونے کے بعد اس نے کئی مسابقتی امتحانات دیئے لیکن مطلوبہ نتائج نہ ملنے پر وہ شدید ذہنی دباو اور مایوسی کا شکار ہو گیا تھا۔ پولیس نے اس سلسلہ میں مقدمہ درج کر کے جانچ شروع کر دی ہے۔