اسکولس کی دوبارہ کشادگی کیلئے الٹی گنتی، تدریسی اشیاء کی قیمتوں میں اضافہ

حیدرآباد: ریاست میں اسکولس کی دوبارہ کشادگی کیلئے الٹی گنتی شروع ہوگئی ہے۔ طلبہ کو گرمائی تعطیلات میں موج مستی کرنے کیلئے صرف دو ہفتوں کا وقت باقی رہ گیا ہے۔

نئے تعلیمی سال میں اسکولس کو12جون سے دوبارہ کھولنے کی تیاریاں کی جارہی ہیں۔

سنٹرل بورڈ آف سکنڈری ایجوکیشن (سی بی ایس سی) سے وابستہ مدارس نے مارچ، اپریل سے ہی نئے تعلیمی سال 2023-24 کا آغاز کردیا ہے جبکہ اسٹیٹ بورڈ سے ملحقہ مدارس میں 12 جون سے تدریسی سرگرمیاں شروع ہوں گی۔

گرمائی تعطیلات قریب الختم ہیں۔ کئی خاندان، جو گرمائی چھٹیاں گذار نے دوسرے مقامات کیلئے روانہ ہوئے تھے، واپس اپنے ٹاونس آنے کی تیاری کررہے ہیں۔ ہشتم، نہم کے امتحانات کے بعد اسکولوں کو 11جون تک گرمائی تعطیلات رہیں گی۔

سی بی ایس ای اسکول کے ایک طالب علم نے کہا کہ گرمائی تعطیلات کے باوجود اسکول انتظامیہ روزانہ صبح ایک گھنٹہ تک آن لائن کلاسس کا اہتمام کررہا ہے۔

صرف2ہفتوں کی گرمائی تعطیلات باقی رہ گئی ہیں۔ والدین، اپنے بچوں کیلئے نیا یونیفارم، نوٹ بکس بیاگ اور دیگر چیزیں خرید نے کیلئے کوشاں ہے۔

مہنگائی میں اضافہ سے تمام تدریسی اشیاء کی قیمتوں میں بھی اضافہ ہوا ہے۔ دریں اثنا محکمہ اسکولی تعلیم نے سرکاری اسکولوں میں داخلہ کرانے کی مہم ”بڈی باٹا“ شروع کرنے کا منصوبہ بنایا ہے۔

یکم تا9جون بڈی باٹا مہم شروع کی جائے گی۔ اساتذہ، گھر گھر ربط پیدا کرتے ہوئے بچوں کی نشاندہی کریں گے اور ان بچوں کو اپنے اپنے اسکولوں میں داخلہ دینے کی سعی کریں گے۔