تلنگانہ میں زرعی انقلاب بپا کرنے کا کے سی آر کو اعزاز:کے کویتا

حیدرآباد: بی آر ایس کی ایم ایل سی کے کویتا نے کہا کہ کالیشورم پراجکٹ کے ذریعہ تلنگانہ میں زرعی انقلاب برپا کرنے کا سہرا چیف منسٹر کے چندر شیکھر راؤ کے سرجاتا ہے جنہوں نے دوراندیشی اور اپنی مدبرانہ بصیرت کے ذریعہ تلنگانہ میں سبز انقلاب لایا ہے۔

کے کویتا آج حلقے اسمبلی یلا ریڈی میں یوم کسان کے موقع پر خطاب کررہی تھیں۔ انہوں نے کہا کہ تلنگانہ میں زرعی شعبہ کے استحکام کیلئے کم وقت میں اقدامات کئے گئے ہیں۔

جو ملک کی دیگر ریاستوں کے لئے قابل تقلید ہیں۔ انہوں نے کہا کہ ملک میں دھان کی کاشت میں تلنگانہ دوسرے نمبر پر پہنچ گیا ہے۔

انہوں نے کہا کہ حکومت کی جانب سے صرف 65 لاکھ کسانوں میں 65ہزار کروڑ روپے تقسیم کئے گئے کسانوں کیلئے5لاکھ روپے کی بیمہ ا سکیم کی فراہمی یہ تلنگانہ ماڈل ہے۔

انہوں نے کہا کہ تلنگانہ حکومت نے مشن کاکتیہ اسکیم کے ذریعہ تالابوں کی از سر نو تعمیر کی ہے تاکہ اس کے ذریعہ بارش کا پانی جمع کیا جاسکے۔ انہوں نے کہا کہ سال2014 سے کسانوں کو مفت 24گھنٹے برقی سربراہ کی جارہی ہے۔

انہوں نے کہا کہ سرحد پر جوان اور کھیت میں کسان کی وجہ سے ہم سب پرامن اورآرام دہ زندگی گذار رہے ہیں۔ اس موقع پر اسپیکر اسمبلی پی سرینواس ریڈی، صدرنشین اردو اکیڈیمی مجیب الدین و دیگر موجود تھے۔