خودکشی نوٹ پر مودی کا مذاق، پرینکا گاندھی کی تنقید

نئی دہلی: کانگریس قائد پرینکا گاندھی وڈرا نے وزیراعظم نریندر مودی کو ایک خودکشی نوٹ پر مذاق کرنے پر نشانہ تنقید بنایا اور کہا کہ وزیراعظم اور ان کے اس لطیفہ پر دل کھول کر ہنسنے والوں کو ذہنی صحت سے متعلق مسائل پر بے حس انداز میں ردعمل ظاہر کرنے کے بجائے اپنے آپ کو تعلیم یافتہ بنانا چاہئے۔

واضح رہے کہ وزیراعظم مودی نے چہارشنبہ کے روز ایک میڈیا چیانل کانکلیو سے خطاب کرتے ہوئے ایک لطیفہ سنایا کہ ایک پروفیسر نے اپنی بیٹی کا خودکشی نوٹ پڑھتے ہوئے یہ تبصرہ کیا تھا کہ اس کی برسوں کی محنت کے باوجود لڑکی کی تحریر میں ہجے کی غلطیاں پائی جاتی ہیں۔

وزیراعظم نے یہ تبصرہ کرتے ہوئے کہ چیانل کے ایڈیٹر اِنچیف اب اچھی ہندی بولنے لگے ہیں‘ یہ لطیفہ سنایا تھا۔ پرینکا گاندھی نے کانکلیو میں سنائے گئے مودی کے لطیفہ کا ویڈیو منسلک کرتے ہوئے ٹویٹ کیا کہ نوجوانوں میں مایوسی اور خودکشی (کے رجحانات) کوئی مذاق کامعاملہ نہیں ہے۔

این سی آر بی کے اعدادوشمار کے مطابق 2021 میں 164033 ہندوستانیوں نے خودکشی کی جن میں سے بیشتر کی عمر 30 سال سے کم تھی۔ یہ ایک المیہ ہے‘ مذاق نہیں۔