جلد ہی مزید 2800 الکٹرک بسیں آرٹی سی بیڑے میں شامل کی جائیں گی: وزیرٹرانسپورٹ تلنگانہ

حیدرآباد: تلنگانہ کے وزیرٹرانسپورٹ پونم پربھاکر نے اسمبلی میں وقفہ سوالات کے دوران ریاست میں الکٹرک گاڑیوں کے فروغ کے لئے حکومت کے اہم منصوبوں کا اعلان کرتے ہوئے بتایا کہ پی ایم ای-ڈرائیو اسکیم کے تحت فی الحال 575 آر ٹی سی بسیں چل رہی ہیں اور جلد ہی مزید 2800 الکٹرک بسیں بیڑے میں شامل کی جائیں گی۔

اس کے علاوہ مرکزی حکومت کی اسکیم کے تحت ورنگل میونسپلٹی کو 100 اور نظام آباد میونسپلٹی کو 50 بسیں فراہم کی جائیں گی۔

وزیر موصوف نے انکشاف کیا کہ کانگریس حکومت کے اقتدار میں آنے کے بعد متعارف کرائی گئی نئی ای وی پالیسی کے نتیجہ میں ایک سال کے دوران ریاست میں ایک لاکھ الکٹرک گاڑیاں فروخت ہوئی ہیں جبکہ حکومت چارجنگ انفراسٹرکچر کو مضبوط بنانے سرکاری دفاتر، تعلیمی اداروں اور گیٹڈ کمیونٹیز میں چارجنگ پوائنٹس قائم کر رہی ہے۔

ای وی پالیسی کی اہم خصوصیات میں یہ شامل ہے کہ الکٹرک گاڑیوں پر دی جانے والی رعایتوں کی وجہ سے حکومت کو 900 کروڑ روپے کے ٹیکس کا نقصان ہوا ہے لیکن ماحولیاتی تحفظ کے لئے حکومت اس پالیسی کو جاری رکھنے پرعزم ہے۔

حکومت نے کمپنیوں سے درخواست کی ہے کہ سرکاری ملازمین کو ای وی کی خریداری پر 20 فیصد رعایت دی جائے جبکہ اسکولوں، ایم این سی کمپنیوں اور خود سرکاری محکموں میں 25 سے 50 فیصد تک الکٹرک گاڑیاں خریدنے کی پالیسی پر غور کیا جا رہا ہے۔

15 سال سے پرانی گاڑیوں کو ہٹانے نئی اسکریپ پالیسی کے تحت مراعات دینے کا جی او جاری کیا گیا ہے اور حیدرآباد میں آلودگی کم کرنے پرانے پٹرول اور ڈیزل آٹوز کو الکٹرک میں تبدیل کرنے کے منصوبہ کا وزیراعلیٰ ریونت ریڈی نے حال ہی میں جائزہ لیا ہے۔

وزیرموصوف نے تمام اراکین اسمبلی سے بھی اپیل کی کہ وہ اپنے حلقوں میں الکٹرک گاڑیوں کا استعمال کریں تاکہ عوام میں اس سلسلہ میں شعور بیدار ہو سکے۔