حیدرآباد میں 63 پولیس انسپکٹروں کا اچانک تبادلہ

حیدرآباد: حیدرآباد سٹی پولیس میں انتظامی بنیادوں پر بڑے پیمانہ پر رد و بدل کرتے ہوئے 63 انسپکٹروں کے اچانک تبادلے کر دیئے گئے ہیں۔

حیدرآباد سٹی پولیس کمشنر نے اس سلسلہ میں احکام جاری کئے اور ہدایت دی ہے کہ یہ تبدیلیاں فوری طور پر نافذ العمل ہوں گی۔

ان احکامات کے مطابق اسپیشل برانچ میں خدمات انجام دینے والے کئی عہدیداروں کو مختلف پولیس اسٹیشنوں میں اسٹیشن ہاؤس آفیسر کے طور پر نئی ذمہ داریاں دی گئی ہیں۔

اس کے علاوہ ٹاسک فورس، ٹریفک برانچ، سائبر کرائم، سی سی ایس، آئی ٹی سیل، بھروسہ سنٹر، شی ٹیم ، جووینائل بیورو اور پی سی آر زونس میں بھی نئے انسپکٹروں کا تعین کیا گیا ہے۔

پولیس کمشنر کے دفتر میں ویٹنگ لسٹ میں موجود عہدیداروں کو بھی مختلف اہم شعبوں میں تعینات کر دیا گیا ہے۔

ان احکامات میں واضح طور پر کہا گیا ہے کہ تمام متعلقہ عہدیدارفوری طور پر اپنی نئی تعیناتی کے مقامات پر چارج سنبھالیں۔ اسے سٹی پولیس کی کارکردگی کو مزید بہتر بنانے اور انتظامی ڈھانچہ کو مضبوط کرنے کی ایک کڑی قرار دیا جا رہا ہے۔