ہولی تعطیلات کے بعد سپریم کورٹ میں حکومت تلنگانہ کی عرضی پر سماعت متوقع

حیدرآباد: حکومت تلنگانہ کی جانب سے گورنر ڈاکٹر تمیلی سائی سوندرا راجن کے خلاف سپریم کورٹ میں دائرکردہ عرضی پر آج سماعت عمل میں نہیں آئی۔

امکان ہے کہ ہولی کی تعطیلات کے بعد عرضی پر سماعت کی جائے گی۔ گذشتہ روز حکومت تلنگانہ نے سپریم کورٹ میں عرضی داخل کرتے ہوئے شکایت کی تھی کہ گورنر‘ اسمبلی میں منظورہ بلز کو منظور کئے بغیر انہیں زیر التواء رکھا ہے تاہم آج حکومت نے اس عرضی کو سماعت کے لئے نہیں رکھا۔

عہدیداروں کے مطابق اس عرضی پر سپریم کورٹ رجسٹری کی منظوری کے بعد ہی سماعت کا امکان ہے۔ واضح رہے کہ 4 مارچ سے سپریم کورٹ کو ہولی کی تعطیلات ہیں۔

ہولی کے تعطیلات کے بعد جب سپریم کورٹ کی سرگرمیوں کا دوبارہ آغاز ہوگا تب اس عرضی پر سماعت ہوگی۔ سپریم کورٹ کو آج سے ایک ہفتہ کے لئے ہولی کی تعطیلات ہیں۔

واضح رہے کہ حکومت کا ماننا ہے کہ اسمبلی میں منظورہ بلز کو گورنر کی جانب سے منظور نہ کئے جانے پر دستور کی خلاف ورزی ہوئی ہے‘ اس لئے دستور کے آرٹیکل 32 کے تحت سپریم کورٹ سے مسئلہ کو رجوع کرنا ناگزیر ہوگیاتھا۔