اے بی وی پی کارکنوں نے پرگتی بھون کا گھیراؤ کرنے کی کوشش کی

حیدرآباد: تلنگانہ پبلک سرویس کمیشن کے پرچہ کے لیک ہونے کے معاملہ میں اے بی وی پی نے حیدرآباد میں وزیراعلی تلنگانہ کے چندرشیکھرراو کے کیمپ آفس پرگتی بھون کے محاصرہ کی کوشش کی۔

اس موقع پر اے بی وی پی کارکنوں اور پولیس کے درمیان بحث وتکرار ہوگئی اور احتجاج کے نتیجہ میں صورتحال کشیدہ ہوگئی۔پولیس نے اے بی وی پی کے کارکنوں کو حراست میں لے لیا۔ان احتجاجیوں نے حکومت کے خلاف نعرے بازی کی اور کہا کہ وزیراعلی کو اس معاملہ پر ردعمل ظاہر کرنا چاہئے۔

انہوں نے الزام لگایا کہ ریاستی حکومت طلباء اور بے روزگاروں کی زندگیوں سے کھیل رہی ہے۔ انہوں نے تلنگانہ پبلک سرویس کمیشن کے چیئرمین اور سکریٹری کو فوری طور پر برخاست کرنے اور وزیراعلی کے چندرشیکھرراو کے فوری استعفیٰ کا مطالبہ کیا۔ انہوں نے برسرخدمت جج کے ذریعہ اس معاملہ کی جانچ کی جائے۔