ویراٹ کوہلی اور روہت شرما نے ٹی ٹوئنٹی انٹرنیشنل کو الوداع کہہ دیا

حیدرآباد: ویراٹ کوہلی اور روہت شرما نے T20 ورلڈ کپ 2024 کے فائنل کے بعد T20 انٹرنیشنل سے ریٹائرمنٹ لے لی۔ ویراٹ نے جیسے ہی ٹائٹل جیتا، انہوں نے فوری طور پر براڈکاسٹر کو اپنی ریٹائرمنٹ کی اطلاع دی، جب کہ روہت نے پریس کانفرنس میں ریٹائرمنٹ کا اعلان کیا۔

 ان دونوں کی T20 انٹرنیشنل سے ریٹائرمنٹ نے ہندوستانی کرکٹ کے ایک دور کا خاتمہ کردیا۔ روہت 2007 سے اور ویراٹ 2010 سے ہندوستان کی T20 ٹیم کا حصہ ہیں۔ دونوں نے اس فارمیٹ میں کئی بڑے ریکارڈ بنائے اور اب ٹی ٹوئنٹی چیمپئن بن کر اپنے کیریئر کو الوداع کہا ۔

کوہلی نے اپنے T20 انٹرنیشنل کیریئر کا آغاز 12 جون 2010 کو کیا۔ اب 14 سال بعد انہوں نے اپنا آخری میچ جون میں ہی کھیلا۔ ویراٹ نے ہندوستان کے لیے 125 ٹی 20 میچ کھیلے، 48.69 کی اوسط سے 4188 رنز بنائے۔

وہ روہت شرما کے بعد اس فارمیٹ میں سب سے زیادہ رنز بنانے والے دوسرے بلے باز ہیں۔ کوہلی نے اپنے کیریئر میں ایک سنچری اور 38 نصف سنچریاں بنائیں۔ وہ T20 ورلڈ کپ کی تاریخ میں سب سے زیادہ 1292 رنز بنانے والے بلے باز بھی ہیں۔ ٹی ٹوئنٹی ورلڈ کپ میں ان کے نام سب سے زیادہ 15 نصف سنچریاں بھی ہیں۔

ایوارڈ حاصل کرتے ہوئے ویراٹ کوہلی نے ریٹائرمنٹ کا اعلان بھی کردیا۔ اُنہوں نے کہاکہ ‘یہ میرا آخری ٹی ٹوئنٹی ورلڈ کپ تھا، ہم یہی حاصل کرنا چاہتے تھے۔ ایک دن آپ کو لگتا ہے کہ آپ بھاگ نہیں سکتے اور ایسا ہوتا ہے۔ اوپر والا بہت اچھا ہے۔ یہ اب یا کبھی نہیں جیسی صورتحال تھی۔

یہ ہندوستان کے لیے میرا آخری T20 میچ تھا۔ ہم اس کپ کو اٹھانا چاہتے تھے۔ ویراٹ کوہلی نے مزید کہاکہ اگر ہم ہار جاتے تو بھی میں ریٹائرمنٹ لے لیتا۔ اب وقت آگیا ہے کہ اگلی نسل ٹی ٹوئنٹی کھیل کو آگے لے جائے۔ آئی سی سی ٹورنامنٹ جیتنے کا انتظار، ہمارے لیے طویل انتظار ہے۔ آپ روہت جیسے کھلاڑی کو دیکھیں، اس نے 9 ٹی ٹوئنٹی ورلڈ کپ کھیلے ہیں اور یہ میرا چھٹا ورلڈ کپ ہے۔ وہ اس فتح کا حقدار ہے۔

وہیں، روہت کے بارے میں بات کرتے ہوئے، انہوں نے 2007 میں T20 ورلڈ کپ ٹرافی جیت کر اپنے T20 بین الاقوامی کیریئر کا آغاز کیا۔ وہ اس ٹیم کا بھی حصہ تھے جو 2007 میں دھونی کی قیادت میں چیمپئن بنی تھی۔

اب نویں ایڈیشن میں انہوں نے خود ہندوستان کو ٹی ٹوئنٹی ورلڈ کپ چیمپئن بنانے کی قیادت کی اور بطور چیمپئن اپنے کیریئر کا خاتمہ بھی کیا۔ روہت نے ٹیم انڈیا کے لیے ٹی 20 میں بطور کپتان 50 میچ جیتے ہیں اور یہ بھی ایک ریکارڈ ہے۔ ٹی ٹوئنٹی میں اب تک کسی کپتان نے ان سے زیادہ میچ نہیں جیتے ہیں۔

اپنی ریٹائرمنٹ کا اعلان کرتے ہوئے روہت نے کہا کہ اس سے بہتر وقت نہیں ہو سکتا۔ انہوں نے کہا- میں یہ ٹرافی اور ٹی 20 ورلڈ کپ جیتنے کے لیے بے چین تھا۔ میں اسے جیتنا چاہتا تھا اور اب یہ ہو گیا ہے۔ خوشی ہے کہ اس بار ہم کامیاب ہوئے ہیں۔

روہت نے کہا کہ وہ ٹسٹ اور ون ڈے فارمیٹ میں ہندوستان کے لیے کھیلنا جاری رکھیں گے، لیکن وہ مختصر ترین فارمیٹ سے دستبردار ہو رہے ہیں۔ روہت نے میچ کے بعد کی پریس کانفرنس کے دوران ہندوستان کے تاریخی دوسرے T20 ورلڈ کپ ٹائٹل کا جشن مناتے ہوئے کہا کہ الوداع کہنے کے لیے اس سے بہتر وقت نہیں ہو سکتا۔