ایئر انڈیا کے پائلٹ کی دہلی کے ہوٹل میں موت
ممبئی میں تعینات ایئر انڈیا کے 40 کی دہائی کے ایک کپتان کی جمعہ کو جنوبی دہلی کے وسنت کنج علاقے میں واقع ایک لگژری ہوٹل کے کمرے میں موت ہوگئی۔ پولیس کے مطابق وہ ہفتہ کی صبح ایک پرواز چلانے والے تھے۔
ممبئی: ممبئی میں تعینات ایئر انڈیا کے 40 کی دہائی کے ایک کپتان کی جمعہ کو جنوبی دہلی کے وسنت کنج علاقے میں واقع ایک لگژری ہوٹل کے کمرے میں موت ہوگئی۔ پولیس کے مطابق وہ ہفتہ کی صبح ایک پرواز چلانے والے تھے۔
پولیس نے بتایا کہ پائلٹ جمعرات سے دورانِ قیام (لے اوور) ہوٹل میں ٹھہرے ہوئے تھے۔ ہفتہ کو صفدر جنگ اسپتال میں ان کا پوسٹ مارٹم کرایا گیا تاکہ موت کی وجہ کا پتہ چل سکے۔ بھارتیہ ناگرک سرکشا سنہتا کی دفعہ 194 کے تحت قانونی کارروائی بھی شروع کردی گئی ہے۔
جنوب مغربی دہلی کے ڈپٹی کمشنر آف پولیس امیت گوئل نے بتایا کہ جمعہ کو ہوٹل انتظامیہ نے وسنت کنج نارتھ تھانے کو واقعے کی اطلاع دی، جس کے بعد پولیس ٹیم موقع پر پہنچی۔ پولیس اہلکاروں نے پائلٹ کو بے ہوشی کی حالت میں پایا اور قریبی اسپتال لے گئے، جہاں ڈاکٹروں نے انہیں مردہ قرار دے دیا۔
پولیس کے مطابق پائلٹ جمعرات کو ہوٹل میں چیک اِن ہوئے تھے۔ جمعہ کی شام ان کے بھائی نے ہوٹل منیجر سے رابطہ کرکے بتایا کہ ان کا بھائی فون کالز کا جواب نہیں دے رہا ہے۔ اس کے بعد منیجر پائلٹ کے کمرے میں پہنچا، جو اندر سے بند تھا۔ ماسٹر چابی کے ذریعے دروازہ کھولا گیا تو پائلٹ بے ہوشی کی حالت میں پڑے ملے۔
ڈی سی پی نے کہا کہ موت کی اصل وجہ پوسٹ مارٹم رپورٹ موصول ہونے کے بعد واضح ہوگی اور مزید تحقیقات جاری ہیں۔
ایئر انڈیا نے ایک بیان میں واقعے پر گہرے دکھ کا اظہار کیا۔ ایئر لائن کے مطابق پائلٹ کو ہفتہ کی صبح ایک پرواز چلانی تھی۔ انہوں نے اس سے قبل ایئر انڈیا ایکسپریس میں خدمات انجام دی تھیں اور تقریباً دو ماہ قبل ایئر انڈیا میں شامل ہوئے تھے۔
ایئر انڈیا کے ترجمان نے کہا کہ کمپنی غم کی اس گھڑی میں پائلٹ کے اہل خانہ سے مسلسل رابطے میں ہے اور انہیں ہر ممکن تعاون فراہم کر رہی ہے۔
