کینیڈا میں ہندوستانی نژاد جوڑا اور اُن کی بیٹی گھر میں زندہ جھلس کر ہلاک،سنسنی خیزانکشاف

نئی دہلی: گزشتہ ہفتے کینیڈا کے صوبے اونٹاریو میں ایک ‘مشتبہ’ گھر میں آگ لگنے سے 3 افراد ہلاک ہو گئے۔ آگ میں ہلاک ہونے والوں کی شناخت ہندوستانی نژاد جوڑے اور ان کی بیٹی کے طور پر ہوئی ہے۔ پولیس نے جمعہ کو یہ جانکاری دی۔

 ایک پریس ریلیز میں، پیل پولیس نے کہا کہ 7 مارچ کو برامپٹن کے بگ اسکائی وے اور وان کرک ڈرائیو کے علاقے میں ایک گھر میں مشتبہ حالات میں آگ لگ گئی۔ پولیس نے آگ بجھانے کے بعد گھر کی تلاشی لی تو انسانی باقیات برآمد ہوئیں تاہم اس وقت ہلاک ہونے والوں کی شناخت اور تعداد معلوم نہیں ہوسکی۔

پولیس نے بتایا کہ جمعہ کو مرنے والوں کی شناخت ہندوستانی نژاد راجیو واریکو (51)، اس کی بیوی شلپا کوٹھا (47) اور بیٹی مہک (16) کے طور پر کی گئی ہے۔ پولیس نے بتایا کہ وہ آگ لگنے سے پہلے اسی پتہ پر رہتے تھے۔

سی ٹی وی نیوز چینل نے رپورٹ کیا کہ پیل پولیس کانسٹیبل ٹیرن ینگ نے جمعہ کو کہا کہ گھر کو "مشتبہ طور پر” نشانہ بنایا گیا تھا۔ رپورٹ میں ینگ کا حوالہ دیتے ہوئے کہا گیا، "معاملہ کی تحقیقات کی جا رہی ہیں اور ہم آگ کو مشتبہ تصور کر رہے ہیں، کیونکہ اونٹاریو فائر مارشل نے تعین کیا ہے کہ یہ آگ حادثاتی نہیں تھی۔” آگ لگنے کی ممکنہ وجہ کے بارے میں پوچھے جانے پر، ینگ نے کہا، "ابھی بہت کچھ نہیں بچا ہے۔”

متوفی خاندان کے پڑوسی کینتھ یوسف نے بتایا کہ یہ خاندان تقریباً 15 سال سے وہاں مقیم تھا اور انہوں نے کبھی کوئی مسئلہ نہیں دیکھا۔ پڑوسی نے بتایا کہ گزشتہ ہفتہ دھماکہ کی آواز سن کر گھر کے ایک فرد نے آگ لگنے کی اطلاع دی تھی۔

رپورٹ میں یوسف کے حوالے سے بتایا گیا کہ ‘جب ہم باہر آئے تو گھر میں آگ لگی ہوئی تھی، بہت افسوسناک تھا، چند گھنٹوں میں سب کچھ تباہ ہو گیا’۔

ایک پریس ریلیز میں پولیس نے کہا کہ ایک ہی خاندان کے تین افراد کی موت کی تحقیقات کی جا رہی ہیں۔ پولیس نے اس معاملے میں کسی کے پاس بھی معلومات رکھنے والوں سے آگے آنے کی اپیل کی ہے۔ پولیس کا کہنا ہے کہ گھر کے اطراف کی چیزوں کی بھی چھان بین کی جا رہی ہے۔