آندھراپردیش: بیٹری کی فیکٹری میں بڑے پیمانہ پرلگی آگ

حیدرآباد: آندھراپردیش کے ضلع چتور میں بیٹری کی فیکٹری میں بڑے پیمانہ پر آگ لگ گئی۔ یہ فیکٹری ضلع کے یادامری منڈل میں واقع ہے جس میں پیر کی شام یہ واقعہ پیش آیا تاہم کسی بھی جانی نقصان کی کوئی اطلاع نہیں ملی ہے۔

ذرائع کے مطابق یہ آگ فیکٹری میں جس وقت لگی اُس وقت فیکٹری میں 250ورکرس کام کررہے تھے جو محفوظ طورپر نکلنے میں کامیاب رہے۔اطلاع ملتے ہی چارفائربریگیڈس نے وہاں پہنچ کر آگ پر قابو پایا۔

آگ کے ساتھ کثیف دھواں بھی نکل رہا تھا جس کی وجہ سے فائربریگیڈس کے اہلکاروں کو آگ پر قابو پانے میں مشکل ہوئی۔سمجھاجاتا ہے کہ شارٹ سرکٹ آگ لگنے کی وجہ ہے۔

اس واقعہ کے ساتھ ہی پولیس اور ریونیو کے عہدیدار وہاں پہنچ گئے جنہوں نے جانچ شروع کردی۔متاثرہ علاقہ کو بند کردیاگیا۔کمپنی نے کہاکہ وہ اپنے ملازمین کی سلامتی کے تعلق سے پابند عہد ہے۔