کانگریس لیڈر پون پر حملہ، کے سی آر کا پتلہ نذر آتش کرنے ریونت ریڈی کا مطالبہ

حیدرآباد: تلنگانہ پردیش کانگریس کے سربراہ ریونت ریڈی نے کانگریس لیڈر ٹی پون پر حملے کی مذمت کی ہے۔انہوں نے ورنگل میں زخمی پون کی عیادت کی جو اسپتال میں زیرعلاج ہیں۔

انہوں نے مطالبہ کیا کہ حملہ کرنے والے ملزمین کے خلاف مقدمہ درج کرکے قانونی کارروائی کی جائے۔ ریونت نے تنقید کی کہ بی آر ایس لیڈران ضلع ورنگل میں انتشار پسند قوتیں بن گئے ہیں۔ انہوں نے کہا کہ متحدہ ورنگل ضلع میں غنڈوں کا راج چل رہا ہے۔

انہوں نے حوالہ دیتے ہوئے کہاکہ کانگریس لیڈر پون کا ماننا ہے کہ متعلقہ رکن اسمبلی کی ایما پر ہی ان پر حملہ کیاگیا۔انہوں نے مقامی ایم ایل اے ونئے بھاسکر کے خلاف مقدمہ درج کرنے کامطالبہ کیا۔

 ریونت نے الزام لگایا کہ پولیس سیاسی دباؤ اور حکومت کی ہدایت پر حملہ آوروں کا تحفظ کررہی ہے۔ریونت ریڈی نے مطالبہ کیا کہ ڈی جی پی کو اس واقعہ کا جواب دینا چاہئے۔ انہوں نے پارٹی کارکنوں سے ریاست بھر میں احتجاجی مظاہرے کرنے اور وزیر اعلیٰ کے پتلے نذرآتش کرنے کی اپیل کی۔