آسٹریلیا کے کپتان پیاٹ کمنس کی والدہ کا انتقال

احمدآباد: کرکٹ آسٹریلیا نے تصدیق کی ہے کہ آسٹریلیائی کپتان پیاٹ کمنس کی والدہ کا کل رات انتقال ہوگیا۔ کمنس بارڈر گواسکر ٹسٹ سیریز کے چوتھے میچ میں نہیں کھیل رہے ہیں۔ انہوں تیسرے میچ میں بھی حصہ نہیں لیاتھا۔ دہلی میں ہندوستان کے خلاف دوسرے میچ کے بعد وہ اپنی ماں کی دیکھ بھال کیلئے آسٹریلیا واپس چلے گئے تھے۔

 آسٹریلوی بورڈ نے ایک بیان میں کہاہے کہ اسٹیو اسمتھ کی قیادت والی ٹیم پیٹ کمنس کی والدہ ماریہ کمنس کے اعزاز میں بازو پر سیاہ پٹیاں باندھے گی۔ کرکٹ آسٹریلیا نے ایک بیان میں کہاہے کہ ماریہ کمنس کی موت سے ہمیں بہت دکھ ہوا ہے۔

 کرکٹ آسٹریلیا کی جانب سے ہم پیاٹ کمنس اور ان کے اہل خانہ کے ساتھ ساتھ ان کے دوستوں سے تعزیت کا اظہار کرتے ہیں۔ آسٹریلوی مردوں کی ٹیم نے احترام کے طورپر آج بازو پر سیاہ پٹیاں باندھ کر میدان میں اتری۔ بی سی سی آئی نے بھی پیاٹ کمنس کی والدہ کے انتقال پر تعزیت کا اظہار کیاہے۔

بورڈ نے ٹوئٹر پر لکھاکہ ہم ہندوستانی کرکٹ کی جانب سے پیاٹ کمنس کی والدہ کے انتقال پر اپنے غم کا اظہار کرتے ہیں۔ ہمارے خیالات اور دعائیں اس مشکل وقت میں ان کے اور ان کے اہل خانہ کے ساتھ ہیں۔