بنگلہ دیش کی سابق وزیراعظم شیخ حسینہ کے خلاف گرفتاری وارنٹ

ڈھاکہ (پی ٹی آئی) بنگلہ دیش کے بین الاقوامی جرائم ٹریبونل نے جمعرات کے روز سابق وزیراعظم شیخ حسینہ کے خلاف گرفتاری وارنٹ جاری کیا جنہیں اگست میں طلبا کی زیرقیادت احتجاج کے بعد اقتدار سے بے دخل کردیا گیا تھا۔

شیخ حسینہ کے علاوہ دیگر 45 افراد کے خلاف بھی انسانیت کے خلاف جرائم کے الزام میں گرفتاری وارنٹ جاری کیا گیا۔

77 سالہ شیخ حسینہ اور دیگر بشمول ان کی پارٹی عوامی لیگ کے سرکردہ قائدین کے خلاف وارنٹ دوبارہ تشکیل شدہ ٹریبونل کی جانب سے عدالتی کارروائی کے آغازکے پہلے دن جاری کئے گئے۔

چیرمین جسٹس محمد غلام مرتضیٰ مجمدار کی زیرصدارت ٹریبونل نے استغاثہ کی جانب سے 2 درخواستیں داخل کئے جانے اور گرفتاری وارنٹ کا مطالبہ کئے جانے پر احکام صادر کئے۔

چیف پراسیکیوٹر محمد تاج الاسلام نے اخبار ڈیلی اسٹار کو یہ بات بتائی۔ بین الاقوامی جرائم ٹریبونل نے متعلقہ حکام کو حکم دیا کہ وہ حسینہ اور دیگر 45 افراد کو 18 نومبر تک اس کے سامنے پیش کریں۔