بنگلورو: قومی تحقیقاتی ایجنسی (این آئی اے) نے کرناٹک میں بنگلورو کے رامیشورم کیفے میں ہوئے دھماکے کے سلسلے میں ایک کیس درج کیا ہے۔
مرکزی وزارت داخلہ کی جانب سے اس سلسلے میں ہدایات جاری کرنے کے بعد این آئی اے نے اتوار کی شام یہ کیس درج کیا۔
این آئی اے کے ذریعہ مقدمہ درج کئے جانے کے باوجود دھماکہ کیس میں اہم جانچ ایجنسی سنٹرل کرائم برانچ ہی رہے گی۔ جمعہ کو یہاں کیفے میں بم دھماکے کے بعد پولیس نے آٹھ ٹیمیں تشکیل دے کر تفتیش تیز کردی ہے۔
ریاستی کانگریس حکومت کو یقین ہے کہ حملہ آور کو پکڑ لیا جائے گا۔ حملہ آور کم شدت والے آئی ای ڈی دھماکے کے لیے ٹائمر لگانے سے پہلے نو منٹ تک کیفے میں رہا۔ اس حملے میں 10 افراد زخمی ہوئے تھے۔
اس سلسلے میں ابھی تک کوئی گرفتاری عمل میں نہیں آئی ہے تاہم حملہ آور کی گرفتاری کے لیے کوئی سراغ نہ ملنے کے بعد پولیس نے پوچھ گچھ کے لیے حراست میں لیے گئے کچھ افراد کو رہا کردیا۔ کرناٹک کے وزیر اعلیٰ سدارامیا نے پولیس کو ریاست میں سیکورٹی بڑھانے کی ہدایت دی ہے۔
وزیر داخلہ ڈاکٹر جی پرمیشور نے کہا کہ دھماکے کی ایک وجہ کاروباری دشمنی اور دوسری وجہ آئندہ لوک سبھا انتخابات اور ریاست میں مستحکم حکومت کی وجہ سے سرمایہ کاروں میں خوف پیدا کرنا ہو سکتا ہے۔ انہوں نے کہا، ’’مستحکم حکومت کو دیکھتے ہوئے بہت سے سرمایہ کار یہاں آرہے ہیں۔ اسی لیے سرمایہ کاروں کو بنگلورو آنے سے روکنے کے لیے یا کسی اور نامعلوم وجہ سے یہ حملہ کیاگیاہوگا۔
