بائیڈن نے نومنتخب صدر کو وائٹ ہاؤس میں کیا مدعو

واشنگٹن: صدر جو بائیڈن نے نومنتخب صدر ڈونالڈ ٹرمپ کو ان کی جیت پر مبارکباد دینے کے لیے فون کیا اور انتظامیہ کی تبدیلی پر بات چیت کے لیے وائٹ ہاؤس میں مدعو کیا۔ ٹرمپ کی انتخابی مہم کے حوالے سے جمعرات کو میڈیا رپورٹس میں یہ اطلاع دی گئی۔

مسٹر ٹرمپ کے ترجمان اسٹیون چیونگ نے بی بی سی کو ایک بیان میں کہا ’’صدر ڈونلڈ ٹرمپ جلد ہی ہونے والی ملاقات کے منتظر ہیں اور انہوں نے اس کال کو بہت سراہا ہے۔‘‘

بی بی سی کی رپورٹ میں کہا گیا ہے کہ یہ بات ذہن میں رکھنا ضروری ہے کہ ڈونلڈ ٹرمپ نے روایت سے ہٹ کر 2020 کے صدارتی انتخابات میں شکست کے بعد بائیڈن کو یہ دعوت نہیں دی تھی۔

صدر عام طور پر آنے والی انتظامیہ کو وائٹ ہاؤس میں مدعو کرتے ہیں، نارتھ پورٹیکو کی سیڑھیوں پر ان کا استقبال کرتے ہیں اور پھر ان کے ساتھ افتتاحی تقریب کے لیے یو ایس کیپیٹل جاتے ہیں، جس میں ٹرمپ نے 2021 میں شرکت نہیں کی تھی۔