بہار کوٹہ مسئلہ، آر جے ڈی کی درخواست پر مرکز کو نوٹس

نئی دہلی: سپریم کورٹ نے جمعہ کے دن راشٹریہ جنتادل(آر جے ڈی) کی درخواست پر مرکز اور ریاستی حکومت سے جواب مانگا۔

پٹنہ ہائی کورٹ نے بہار میں دلتوں‘ قبائلیوں اور پسماندہ طبقات کا 50 فیصد کوٹہ بڑھاکر 65 فیصد کردینے کے ریزرویشن ترمیمی قانون کو رد کردیا تھا جس کے خلاف آر جے ڈی سپریم کورٹ سے رجوع ہوئی تھی۔

چیف جسٹس ڈی وائی چندرچوڑ‘ جسٹس جے بی پاڑدی والا اور جسٹس منوج مشرا پر مشتمل بنچ نے آر جے ڈی کے وکیل پی ولسن کی بات کا نوٹ لیا۔

سی جے آئی نے کہا کہ نوٹس جاری کی جائے اور معاملہ کو زیرالتوا درخواستوں سے جوڑدیا جائے۔

29 جولائی کو ملک کی سب سے بڑی عدالت نے ایسی ہی 10 درخواستوں کی سماعت کرتے ہوئے پٹنہ ہائی کورٹ کے حکم پر روک لگانے سے انکار کردیا تھا۔

بنچ نے تاہم ہائی کورٹ کے فیصلہ کے خلاف حکومت ِ بہار کی درخواست کی سماعت پر آمادگی ظاہر کی تھی۔ حکومت ِ بہار بھی ہائی کورٹ کے فیصلہ کے خلاف سپریم کورٹ سے رجوع ہوئی تھی۔