مہاراشٹر میں کورونا کے 43 نئے کیس، فعال مریضوں کی تعداد 209، چار اموات،ممبئی سب سے زیادہ مریض
محکمہ صحت عامہ کی جانب سے فراہم کردہ اعداد و شمار کے مطابق، ریاست میں سب سے زیادہ 35 مریض ممبئی میں رپورٹ ہوئے ہیں، جبکہ پونے میں 8 افراد کورونا سے متاثر پائے گئے ہیں۔ رواں ماہ اب تک کورونا کے کل 242 کیسز سامنے آ چکے ہیں۔
ممبئی: ریاست مہاراشٹر میں کورونا انفیکشن کے کیسز میں ایک بار پھر اضافہ دیکھنے میں آ رہا ہے، جہاں گزشتہ 24 گھنٹوں کے دوران مزید 43 نئے مریض سامنے آئے ہیں۔
محکمہ صحت عامہ کی جانب سے فراہم کردہ اعداد و شمار کے مطابق، ریاست میں سب سے زیادہ 35 مریض ممبئی میں رپورٹ ہوئے ہیں، جبکہ پونے میں 8 افراد کورونا سے متاثر پائے گئے ہیں۔ رواں ماہ اب تک کورونا کے کل 242 کیسز سامنے آ چکے ہیں۔
محکمہ صحت کے مطابق، یکم جنوری سے 25 مئی تک ریاست میں 7,389 مشتبہ مریضوں کی کورونا وائرس کے لیے جانچ کی گئی، جن میں سے 300 افراد میں کورونا وائرس کی تصدیق ہوئی۔ ان میں سب سے زیادہ 248 مریض ممبئی میں ریکارڈ کیے گئے۔ ریاست میں اس وقت فعال کورونا مریضوں کی تعداد 209 ہے، جب کہ 87 مریض صحت یاب ہو چکے ہیں۔
جنوری سے اب تک ریاست میں کورونا سے 4 مریضوں کی موت ہو چکی ہے۔ ان تمام مریضوں کو دیگر بیماریاں بھی لاحق تھیں۔ ایک مریض کو گردے کی بیماری اور اعصابی عارضہ تھا، دوسرے کو کینسر، تیسرے کو برین اسٹروک اور مرگی کا مرض تھا، جبکہ چوتھے مریض کو ذیابیطس کی شدید شکل لاحق تھی۔
محکمہ صحت نے کورونا انفیکشن کی بڑھتی ہوئی تعداد کے پیش نظر ریاست میں فلو اور سانس کی بیماریوں کے مریضوں کا سروے شروع کر دیا ہے۔ سروے میں جن مشتبہ مریضوں کی شناخت ہو رہی ہے، ان کا کورونا وائرس کے لیے ٹیسٹ کیا جا رہا ہے۔
فی الحال ریاست میں کورونا کے زیادہ تر مریض ہلکی علامات کے ساتھ سامنے آ رہے ہیں اور سرکاری اسپتالوں میں کورونا ٹیسٹ اور علاج کی سہولیات دستیاب ہیں۔ اس لیے شہریوں سے اپیل کی گئی ہے کہ وہ گھبرائیں نہیں۔
