سنگاریڈی میں بی جے پی امیدوار کو بی فام نہیں ملا، پارٹی قیادت پر دیش پانڈے برہم (ویڈیو)

حیدرآباد: بی جے پی امیدواروں کو ٹکٹ دینے کے اعلان کے بعد ان میں بی فام کی اجرائی نہ کرنے سے حلقہ اسمبلی سنگاریڈی میں ریٹرننگ آفیسر کے دفتر کے روبرو جذباتی مناظر دیکھے گئے۔

بی جے پی کے امیدوار راجیشور راؤ دیش پانڈے نے احتجاج منظم کرتے ہوئے بی جے پی قیادت پر اپنی نارضگی اور برہمی ظاہر کی۔ آج بی جے پی کی جانب سے جاری کردہ بی جے پی امیدواروں کی فہرست میں حلقہ اسمبلی سنگاریڈی سے راجیشور راو دیش پانڈے کو ٹکٹ دینے کا اعلان کیا گیا۔

مگر انہیں بی فام (پارٹی کا اصلی امیدوار) نہ دینے سے انہیں مایوسی کا سامنا کرناپڑا۔ اس واقعہ کی اطلاع صدر بی جے پی تلنگانہ جی کشن ریڈی کو دیتے ہوئے وہ خوب روے اور بی فام نہ دینے پر خودکشی کرلینے کی دھمکی دی۔ واضح رہے کہ آج تلنگانہ اسمبلی انتخابات کیلئے پرچہ نامزدگی داخل کرنے کا عمل اختتام پذیر ہوا۔