بریکنگ نیوز: رجب طیب اردوان مسلسل تیسری مرتبہ صدر ترکیہ منتخب

استنبول: ترکیہ کے صدارتی انتخاب کے حتمی مرحلے میں صدر رجب طیب اردوان نے کامیابی حاصل کرلی۔ وہ مسلسل تیسری بار ترکیہ کے صدر منتخب ہوگئے ہیں۔

آج ترکیہ میں صدارتی انتخابات کے حتمی مرحلے میں پولنگ کا سلسلہ مقامی وقت کے مطابق صبح 8 بجے سے  5 بجے تک جاری رہا۔ پولنگ کے فوری بعد ووٹوں کی گنتی کا عمل شروع ہوا اور اب تک 98.06 فیصد ووٹوں کی گنتی مکمل کرلی گئی ہے۔

اب تک کے نتائج کے مطابق صدر اردوان 52.12 فیصد ووٹ لے کر آگے ہیں جبکہ اپوزیشن امیدوار کمال قلیچ دار اوغلو 47.88 فیصد ووٹ حاصل کرپائے ہیں۔

اب تک کے نتائج کے مطابق صدر اردوان کو 2 کروڑ 68  لاکھ37  ہزار 84 ووٹ حاصل ہوئے ہیں جبکہ اپوزیشن امیدوار  کمال قلیچ دار اوغلو نے 2 کروڑ 46 لاکھ 54 ہزار 839 ووٹ لئے ہیں۔

صدارتی انتخاب میں 85 فیصد سے زائد رائےدہندوں نے حصہ لیا۔ اس کے علاوہ سمندر پار رہنے والے ترکی شہریوں کے ووٹوں کی گنتی کا سلسلہ بھی جاری ہے۔

دوسرے مرحلے میں زیادہ ووٹ لینے والا امیدوار کامیاب قرار پائے گا۔ تاہم ترکیہ کے قانون کے مطابق صدارتی انتخابات جیتنے کے لئے 51 فیصد ووٹ حاصل کرنا ضروری ہے۔

اسی دوران اردوان کی جیت کی خوشی میں ترکیہ بھر میں ان کے حامی سڑکوں پر نکل آئے اور فتح کا جشن منایا جبکہ صدر اردوان نے بھی استنبول میں ہزاروں حامیوں سے خطاب کیا۔

خیال رہے کہ ترکیہ میں 14 مئی کو ہونے والے صدارتی انتخاب میں ووٹر ٹرن آؤٹ 90 فیصد رہا تاہم کسی بھی امیدوار کے 50 فیصد ووٹ حاصل نہ کرنے کے باعث صدر کا فیصلہ نہ ہو سکا تھا۔