بارش سے شدید متاثر تلنگانہ کے لیے ہیلی کاپٹرس روانہ کرنے بنڈی سنجے کی دفاع کے عہدیداروں کو ہدایت

حیدرآباد: تلنگانہ میں فوجی ہیلی کاپٹروں کی آمد میں تاخیر پر مرکزی مملکتی وزیرداخلہ بنڈی سنجے نے دفاع کے حکام سے تفصیلات حاصل کیں۔ اس موقع پر انہوں نے وزارتِ دفاع کے عہدیداروں سے فون پر بات کی۔

مرکزی دفاعی حکام نے سنجے کو بتایا کہ تلنگانہ کے لیے تین ہیلی کاپٹر تیار کیے گئے ہیں تاہم مسلسل بارش اور ناسازگار موسم کی وجہ سے متاثرہ علاقوں میں ہیلی کاپٹروں کی آمد میں تاخیر ہورہی ہے۔

حکام نے وضاحت کی کہ متبادل اسٹیشنوں سے ہیلی کاپٹر روانہ کرنے کا عمل جاری ہے اور ناندیڑ، بیدر اسٹیشنوں سے ہیلی کاپٹر بھیجنے کی کوشش کی جارہی ہے۔ اسی دوران بنڈی سنجے نے انہیں بتایا کہ شدید بارش کے باعث ایس آر ایس پی اور مانیر ندیوں میں زبردست سیلابی صورتحال پیدا ہوگئی ہے۔

انہوں نے مزید کہا کہ متاثرہ علاقوں کے عوام کو محفوظ مقامات پر منتقل کرنے کے لیے ریاستی حکومت جنگی پیمانہ پر اقدامات کررہی ہے اور اس سلسلہ میں این ڈی آر ایف کی ٹیمیں پوری طرح سرگرم ہیں۔ سنجے نے حکام سے مطالبہ کیا کہ ہیلی کاپٹر جلد از جلد روانہ کیے جائیں۔