پہلگام دہشت گرد حملے کے متاثرین سے اظہار یکجہتی کیلئے کینڈل مارچ

حیدرآباد: جموں و کشمیر کے پہلگام میں معصوم سیاحوں پر ہونے والے خوفناک دہشت گرد حملے کے متاثرین سے اظہار یکجہتی کے لیے حیدرآباد کے نیکلس روڈ پر ڈاکٹر بی آر امبیڈکر کے مجسمہ کے سامنے جمعرات کی شام ایک شمع روشن مارچ کا انعقاد کیا گیا۔

اس پروگرام کا اہتمام ایسوسی ایشن فار پروٹیکشن آف سول رائٹس (APCR) نے کیا، جس میں آل انڈیا ملی کونسل (AIMC)، تلنگانہ ویمنز اینڈ ٹرانس جے اے سی، نیشنل الائنس فار پیپلز موومنٹس (NAPM)، ریتھو سوراجیہ ویدیکا (RSV)، بھارت جوڑو ابھیان (BJA)، کلائمیٹ فرنٹ حیدرآباد اور تلنگانہ پیپلز جوائنٹ ایکشن کمیٹی (TPJAC) نے بھی شرکت کی۔

اس موقع پر خواتین، بچوں، طلباء اور مختلف سماجی کارکنوں نے شرکت کی اور شمعیں جلا کر خاموشی کے ساتھ متاثرین کو خراج عقیدت پیش کیا۔ شرکاء نے دہشت گردی کے خلاف اپنے اتحاد اور امن کے پیغام کو اجاگر کیا۔

ممتاز سماجی کارکنان اور عوامی شخصیات جنہوں نے اس پروگرام میں شرکت کی، ان میں سجایا، سندھیا، سبکدوش آئی اے ایس افسر اکنوری مرلی، ماریا عارف الدین (TPU, APCR)، ناویکا ہرشے (AIPC)، پروفیسر پدماجا، پروفیسر ویشویشور، وینکٹ ریڈی، میرا سنگھمترہ، مفتی عمر عابدین، ایڈوکیٹ افسر جہاں، سارہ میتھیوز، کرن وسا، کسان رہنما ارشی ایوب، دیپتی (خواتین حقوق کی کارکن)، عمران صدیقی (قبائلی کارکن)، اور ڈاکٹر عثمان (جماعت اسلامی ہند) شامل تھے۔ یہ شمع روشن مارچ امن، اتحاد اور دہشت گردی کے خلاف اجتماعی آواز کو اجاگر کرنے کا ذریعہ تھا۔