سی بی آئی نے سلچر میں ریلوے کے سینئر انجینئر کو رشوت لیتے ہوئے گرفتار کر لیا

نئی دہلی: مرکزی تفتیشی بیورو (سی بی آئی) نے آسام کے سلچر میں شمال مشرقی سرحدی ریلوے کے ایک سینئر سیکشن انجینئر کو ایک ٹھیکیدار سے مبینہ طور پر رشوت طلب کرنے اور وصول کرنے کے الزام میں گرفتار کر لیا ہے۔

سی بی آئی نے اتوار کو یہ اطلاع دی۔ ادارے کے مطابق ملزم افسر، کنتل چودھری، نے شکایت کنندہ کی جانب سے پہلے ہی مکمل کیے جا چکے کام کے تقریباً 20 لاکھ روپے کے زیر التوا بل کو منظور کرنے کے عوض مبینہ طور پر ایک فیصد رشوت کا مطالبہ کیا تھا۔

ٹھیکیدار نے بل کی منظوری کے لیے 12 جون کو انجینئر سے رابطہ کیا تھا، جس کے بعد ملزم نے ادائیگی کے عمل کو آگے بڑھانے کے لیے مبینہ طور پر غیر قانونی رقم کا مطالبہ کیا۔

شکایت موصول ہونے پر سی بی آئی نے ہفتے کے روز مقدمہ درج کیا اور جال بچھایا۔ ملزم کو شکایت کنندہ سے 20 ہزار روپے رشوت لیتے ہوئے رنگے ہاتھوں گرفتار کر لیا گیا۔

اس معاملے کی تحقیقات جاری ہیں اور ملزم افسر کی رہائش گاہوں کی تلاشی لی جا رہی ہے۔