علمِ بی بی مبارک کی سواری کے لیے ہاتھی کی منظوری، میر فراست علی باقری کا حکومتِ تلنگانہ اور جی کشن ریڈی سے اظہارِ تشکر

حیدرآباد: سینئر بی جے پی رہنما میر فراست علی باقری نے 10 محرم الحرام، 27 جون 2026 کو یومِ عاشورہ کے موقع پر دبیرپورہ سے برآمد ہونے والے تاریخی جلوس "سواری علمِ بی بی مبارک” کے لیے ہاتھی کی فراہمی کی منظوری پر مرکزی وزیر برائے کوئلہ و کانکنی جی کشن ریڈی اور حکومتِ تلنگانہ کا دلی شکریہ ادا کیا ہے۔

تفصیلات کے مطابق میر فراست علی باقری نے علمِ بی بی مبارک کے مذہبی و تاریخی جلوس کے لیے ہاتھی فراہم کرنے کی درخواست پیش کی تھی، جسے مرکزی وزیر جی کشن ریڈی نے خصوصی ترجیحی سفارش (VIP Reference) کے طور پر متعلقہ حکام کو روانہ کیا۔ اس درخواست پر فوری کارروائی کرتے ہوئے حکومتِ تلنگانہ کے محکمہ ماحولیات، جنگلات، سائنس و ٹیکنالوجی (EFS&T) نے پرنسپل چیف کنزرویٹر آف فاریسٹ اور چیف وائلڈ لائف وارڈن کو کیپٹو ایلیفینٹ (ٹرانسفر یا ٹرانسپورٹ) رولز 2024 کے تحت ضروری اقدامات کرنے کی ہدایت جاری کی۔

میر فراست علی باقری نے محکمہ ماحولیات، جنگلات، سائنس و ٹیکنالوجی کے پرنسپل سکریٹری احمد ندیم، آئی اے ایس، اور چیف وائلڈ لائف وارڈن و پرنسپل چیف کنزرویٹر آف فاریسٹ (وائلڈ لائف) ڈاکٹر ونئے کمار، آئی ایف ایس، کا بھی خصوصی شکریہ ادا کیا۔ انہوں نے کہا کہ مذکورہ افسران نے قدیم مذہبی روایت کے تحفظ کے ساتھ ساتھ جنگلی حیات سے متعلق قوانین اور ضابطوں کی مکمل پاسداری کو یقینی بنانے میں اہم کردار ادا کیا ہے۔

انہوں نے کہا کہ ہاتھی کی فراہمی کی منظوری حکومت کے اس عزم کا مظہر ہے کہ حیدرآباد کے تاریخی، ثقافتی اور مذہبی ورثے کے تحفظ کے ساتھ ماحولیاتی اور جنگلی حیات کے قوانین پر بھی مکمل عمل درآمد برقرار رکھا جائے۔

میر فراست علی باقری نے سواری علمِ بی بی مبارک کے منتظمین، عزاداران اور تمام شرکاء سے اپیل کی کہ وہ متعلقہ حکام کے ساتھ مکمل تعاون کریں اور جلوس کو پُرامن، باوقار اور مقررہ رہنما اصولوں کے مطابق منعقد کرنے میں اپنا بھرپور کردار ادا کریں۔

انہوں نے امید ظاہر کی کہ صدیوں پر محیط تاریخی اہمیت کا حامل جلوس سواری علمِ بی بی مبارک آئندہ بھی مذہبی عقیدت، بھائی چارے، فرقہ وارانہ ہم آہنگی اور حیدرآباد کی عظیم تہذیبی روایات کی علامت کے طور پر اپنی شناخت برقرار رکھے گا۔