تلنگانہ کے اسکولوں میں’چیف منسٹر بریک فاسٹ اسکیم‘

حیدرآباد: دسہرہ تہوار کے تحفہ کے طور پر، تلنگانہ حکومت نے 24 اکتوبر سے سرکاری پرائمری اور ہائی اسکولوں (کلاس 1 سے 10) کے طلباء کے لئے ‘چیف منسٹر بریک فاسٹ اسکیم’ کا اعلان کیا ہے۔

سرکاری ذرائع نے ہفتہ کو یہ اطلاع دی۔ انہوں نے کہا کہ ریاستی حکومت نے اس سلسلے میں احکامات جاری کردئے ہیں۔ اس اسکیم سے حکومت کو 400 کروڑ روپے کی اضافی رقم خرچ ہوگی۔ وزیراعلیٰ کے چندر شیکھر راؤ (کے سی آر) کی حکومت نے طلبہ کی بہبود کے لیے یہ فیصلہ کیا ہے۔

انہوں نے کہا کہ اس اسکیم کا بنیادی مقصد طلباء کو معیاری تعلیم کے ساتھ ساتھ اچھی، غذائیت سے بھرپور خوراک فراہم کرنا ہے۔

غریب خاندانوں کے طلباء کو غذائیت سے بھرپور خوراک فراہم کرنے کے ساتھ ساتھ حکومت ان کی پڑھائی پر توجہ بڑھانے پر بھی توجہ دے رہی ہے۔ ریاستی حکومت نے ہائی اسکول کے طلباء کوبھی بغیر کسی قیمت کے ناشتہ فراہم کرانے کا فیصلہ کیا ہے۔