امشالہ سوامی کے دیہانت پر چیف منسٹر کے سی آر کا اظہار دکھ

حیدرآباد: چیف منسٹر کے چندر شیکھر راؤ نے امشالہ سوامی کے دیہانت پر گہرے دکھ کا اظہار کیا جنہوں نے زندگی بھر فلورسیس مسئلہ کے خاتمہ کیلئے جدوجہد کی تھی۔

چیف منسٹر کے سی آر نے یاد دلایا کہ امشالہ سوامی، فلورسیس کے مترادف تھے۔ متحدہ ریاست اے پی کے ضلع نلگنڈہ میں فلورسیس ایک بڑے سماجی خطرہ کے طور پر ابھرا تھا۔

انہوں نے کہا کہ سوامی کی جدوجہد جذبہ انسانیت کی عکاسی تھی اور علیحدہ تلنگانہ تحریک کے دوران اپنی اس جدوجہد سے انہوں نے کئی افراد کو متاثر بھی کیا تھا۔

کے سی آر نے کہا کہ سوامی کے انتقال کی خبر سے انہیں کافی دکھ ہوا ہے اور انہوں نے غمزدہ افراد خاندان سے دلی ہمدردی کا اظہار کیا۔ دریں اثناء ریاستی وزیر کے ٹی آر نے بھی سوامی کے انتقال پر گہرے دکھ کا اظہار کیا۔