کانگریس کی سیاست اقتدار نہیں، عوامی خدمت کے لیے ہے: محمد فہیم قریشی
انہوں نے کہا کہ کانگریس پارٹی کی سیاست اقتدار کے حصول کے لیے نہیں بلکہ عوامی خدمت کے جذبے پر مبنی ہے۔ ان کے مطابق بلدیاتی اداروں میں کانگریس کی مضبوط نمائندگی سے شہری سہولتوں میں نمایاں بہتری آئے گی اور عوامی مسائل کا مؤثر حل ممکن ہو سکے گا۔
حیدرآباد: ٹی آئی ایم آر آئی ای ایس (TIMRIES) کے چیئرمین اور کانگریس کے سرگرم قائد محمد فہیم قریشی نے نرساپور میں 11 فروری کو ہونے والے بلدیاتی انتخابات کے پیش نظر عوام سے اپیل کی ہے کہ وہ ترقی، شفاف طرزِ حکمرانی اور سماجی انصاف کے لیے کانگریس امیدواروں کو بھاری اکثریت سے کامیاب بنائیں۔
انہوں نے کہا کہ کانگریس پارٹی کی سیاست اقتدار کے حصول کے لیے نہیں بلکہ عوامی خدمت کے جذبے پر مبنی ہے۔ ان کے مطابق بلدیاتی اداروں میں کانگریس کی مضبوط نمائندگی سے شہری سہولتوں میں نمایاں بہتری آئے گی اور عوامی مسائل کا مؤثر حل ممکن ہو سکے گا۔
محمد فہیم قریشی نے واضح کیا کہ کانگریس امیدواروں کی کامیابی کی صورت میں نرساپور میں سڑکوں کی بہتری، نکاسیٔ آب کے مؤثر انتظام، صاف پینے کے پانی کی فراہمی، اسٹریٹ لائٹس کی تنصیب، صفائی ستھرائی کے نظام کو مضبوط بنانے اور عوامی صحت کے مراکز کو فعال کرنے کو اولین ترجیح دی جائے گی۔
انہوں نے کہا کہ کانگریس حکومت نے ہمیشہ غریبوں، اقلیتوں، خواتین اور نوجوانوں کی فلاح و بہبود کے لیے ٹھوس اور مؤثر اقدامات کیے ہیں اور یہی پالیسی بلدیاتی سطح پر بھی نافذ کی جائے گی تاکہ ہر طبقہ خود کو ترقی کے عمل میں شریک محسوس کرے۔
محمد فہیم قریشی نے مزید کہا کہ نوجوانوں کے لیے ہنرمندی کی تربیت، چھوٹے کاروباروں کے فروغ اور روزگار کے مواقع پیدا کرنے میں بلدیہ کا کردار نہایت اہم ہے، جسے کانگریس امیدوار پوری ذمہ داری اور دیانت داری کے ساتھ انجام دیں گے۔ انہوں نے اس بات پر زور دیا کہ کانگریس کی جیت سے بلدیہ میں بدعنوانی کے بجائے شفافیت اور جوابدہی کو فروغ ملے گا اور عوامی مسائل کے حل کے لیے ایک مضبوط اور فعال نظام قائم ہوگا۔
آخر میں انہوں نے ووٹروں سے اپیل کی کہ وہ 11 فروری کو بڑی تعداد میں پولنگ مراکز پہنچ کر اپنے حقِ رائے دہی کا استعمال کریں اور کانگریس امیدواروں کو کامیاب بنا کر نرساپور کو ترقی، خوشحالی اور باوقار شہری زندگی کی راہ پر گامزن کریں۔
